Qırımnıñ Rusiye parlamenti 1991 senesinden 2013 senesine qadar «Ukrainadan kelgen zarar» miqdarı 2,5 trln ruble teşkil etti, dep bildire.
Bu aqta Qırım parlamentiniñ matbuat hızmeti mezkür «ziyannı» esaplağan «işçi gruppanıñ» toplaşuvı neticelerine esaslanıp haber ete.
«İqtisadiy zarar talili içün 1991 ve 2013 seneleriniñ umumiy içki mahsulat köstergiçi alınğan edi, böylece, faydalanmağan kârlarnıñ miqdarı 2,5 mlrd ruble teşkil etti», – dep aytıla haberde.
«İşçi gruppa» iştirakçileri 1999 senesinden 2014 senesine qadar mesken-kommunal hocalıq saasında «Qırım yeterli qadar» maliye etilmedi ve «donatma 87%-ğa iprandı», dep bildirdi.
Qırım parlamenti «2015 senesi Ukraina tarafından yarımadanıñ energiya qamaçavından olğan zararnı» da esapladı.
«Hocalıq subyektleri körgen umumiy ziyan 1 mlrd ruble oldı, alınmağan kâr – 1,5 mlrd ruble», – dep aytıla haberde.
Qırımnıñ Rusiye parlamenti spikeriniñ birinci muavini Yefim Fiksniñ aytqanına köre, malümat toplav basamağı yekünlenmekte, şimdi teren ve tafsilâtlı bir talil vaqtı keldi».
Körüşüv neticesinde Fiks alt gruppalarnıñ reberlerine «aqımdaki seneniñ ortasında işleriniñ daa tam bir neticesini» taqdim etmege tevsiye etti.
Ukraina akimiyeti Qırımnıñ Rusiye akimiyetiniñ «Ukrainadan kelgen zarar» miqdarına dair malümatnı daa izaatlamadı.
Martnıñ 15-nde Devlet Dumasınıñ Şurası ve Qırımnıñ Rusiye parlamenti ve Aqyar ükümetiniñ toplaşuvında Volodin Rusiye Ukrainadan Qırım onıñ terkibinde bulunğan 25 yıl içün ivaz tölemesini talap etmeli, dep bildirdi.
Martnıñ 20-nde Rusiye Devlet dumasınıñ reisi Vâçeslav Volodin Rusiye parlamentiniñ alt palatasında «Ukrainanıñ areketlerinden Qırım yarımadasınıñ iqtisadiyatına ketirilgen zararğa» qıymet kesecek mahsus işçi gruppa qurulğanını bildirgen edi.
Rusiye Devlet Duması Ukrainanıñ mustaqilligi ilân etilgeninden Rusiye yarımadanı işğal etkenine qadar Qırım körgen «zararnıñ» miqdarı 1,5 trln rubleden «daa çoq» oldı, dep bildirdi.
Bu sene aprel ayında Kreml kontrolindeki Qırım parlamentinde «Ukrainadan kelgen zarar» talili boyunca işçi gruppanıñ birinci toplaşuvı keçirildi.
2014 senesi fevral ayında Qırımda işaretsiz urbada silâlı insanlar peyda oldı. Olar Qırım Yuqarı Şurası, Aqmescit ava limanı, diger strategik obyektlerni zapt etip, Ukraina ordusınıñ areketlerini blok etken edi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
