Ukrainanıñ mustaqilligi ilân etilgeninden Rusiye yarımadanı işğal etkenine qadar Qırım körgen «zararnıñ» miqdarı 1,5 trln rubleden «daa çoq» oldı.
Bu aqta aprelniñ 3-nde Rusiye Devlet Dumasındaki işçi gruppanıñ ilk toplaşuvında aytıldı, dep bildire «İnterfaks» Rusiye haber agentligi.
Haber etilgenine köre, gruppa «1991-2014 senesi Qırımnıñ iqtisadiy ğaybına da qıymet kesecek».
Devlet Dumasınıñ Qırım deputatı Andrey Kozenko buña yarımadanıñ «Ukraina kontroli altında ve Rusiyege qoşulğan soñ» bücet kârınıñ farqı, ekologik «ziyan», sanktsiyalardan kelgen zarar, Rusiye Qara deñiz flotunıñ Aqyarda bulunğanı içün kira parası, qoruq ve şifahanelerden «elde etilmegen» kârnı qoştı, dep bildire Azatlıq Radiosınıñ rus bürosı.
«Yarımadadan qaçıp, ukrain banklarını alğan qırımlılarnıñ emanetleri ayrı satırnen qayd etilmeli», – dep qoştı Kozenko.
Deputat, onıñ fikirince, Ukraina akimiyetiniñ qırımlılarğa ketirgen «maneviy zararğa da qıymet kesmege» teklif etti.
«Yarımada sakinleri oğrağan rus tilli eali aqlarınıñ sıñırlavını da kirsetmek mümkün», – dedi Kozenko. Tam olaraq ne demek istegenini aytmadı.
Martnıñ 20-nde Rusiye Devlet dumasınıñ reisi Vâçeslav Volodin Rusiye parlamentiniñ alt palatasında «Ukrainanıñ areketlerinden Qırım yarımadasınıñ iqtisadiyatına ketirilgen zararğa» qıymet kesecek mahsus işçi gruppa qurulğanını bildirgen edi.
Martnıñ 15-nde Devlet Dumasınıñ Şurası ve Qırımnıñ Rusiye parlamenti ve Aqyar ükümetiniñ toplaşuvında Volodin Rusiye Ukrainadan Qırım onıñ terkibinde bulunğan 25 yıl içün ivaz tölemesini talap etmeli, dep bildirdi.
2014 senesi martnıñ 16-nda Qırım ve Aqyarda yarımada statusınen bağlı dünyada tanılmağan «referendum» olıp keçti, onıñ neticesinde Rusiye Qırımnı öz terkibine aldı. Ukraina, Avropa Birligi, ABD «referendumdaki» rey neticelerini tanımadı. Rusiye prezidenti Vladimir Putin martnıñ 18-nde Qırımnıñ Rusiyege «qoşulğanını» ilân etti.
Halqara teşkilâtlar, Qırımnıñ işğali ve ilhaqını qanunsız tanıp, Rusiyeniñ areketlerini takbih ettiler. Ğarp devletleri bir sıra iqtisadiy sanktsiyalarnı qullandı. Rusiye, yarımadanı işğal etkenini inkâr etip, buña «tarihiy adaletniñ tiklenmesi», dey. Ukrainanıñ Yuqarı Radası 2014 senesi fevralniñ 20-ni, Rusiye tarafından Qırım ve Aqyarnıñ muvaqqat işğali başlağan künü olaraq resmen ilân etti.
