Moskva kontrolindeki Qırım suv hocalığı ve melioratsiya devlet komitetiniñ reisi İgor Vaylniñ bildirgenine köre, yarımadanıñ suv teminlevinen bağlı qorqular yoq. Onıñ aytqanına köre, suv anbarları yağanaqlar sayesinde toldurıla.
«İçilecek suv yetmeycek dep qorqu yoq. Suv anbarlarınıñ toldurılması yahşı», – dep bildire Vaylniñ aytqanlarını TASS haber agentligi.
Rusiye prezidenti Vladimir Putin Qırım akimiyeti yarımadanıñ suv teminlevi problemine az diqqat ayıra, dep qayd etti.
Rusiye suv teminlevi birligi, sanktsiyalar Qırımnıñ suv hocalığı inkişafına menfiy tesir ete, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
