Rusiye prezidenti Vladimir Putin yanvarniñ 10-nda Yaltada keçirgen toplaşuvda Qırım akimiyeti yarımadanıñ suv teminlevine az diqqat ayıra, dep qayd etti.
«Çoq şey yapıldı, amma daa er şey degil. Daa suv teminlevi problemleri, mında kimseniñ işi olmağan kibi körüngen ekologik meselelerniñ al etilüvi üzerinde çalışmaq kerek», – dep bildire Putinniñ aytqanlarını TASS agentligi.
Daa evel toplaşuvda Qırımnı tertip-nizamğa ketirip, yerli ealiniñ yaşayış keyfiyetini eyileştirmek kerek, dep ayttı.
Qırım kütleviy haber vastaları, yanvarniñ 10-nda Rusiye prezidenti Yaltada Kreml kontrolindeki Qırım ve Aqyar reberlerinen toplaşuv keçirip, yarımadanıñ içtimaiy-iqtisadiy inkişafı meselelerini laf etecek, dep bildirdi.
Vladimir Putin yanvarniñ 9-nda Aqyarda edi. O, Rusiyeniñ Şimaliy ve Qara deñiz flotlarınıñ Qara deñizde keçirgen talimlerni «Marşal Ustinov» raketa kreyserinden közetti.
Ukraina Tış işler nazirligi Putinniñ daa bir Qırım ziyaretine qarşı narazılıq bildirdi. Yanvarniñ 10-nda Rusiye Tış işler nazirligi narazılıq beyanatını baqmayıp Kyivge qaytarğanını haber etti.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
