Qırım Muhtar Cumhuriyetiniñ suv hocalığı qurucılığı ve suvarılğan ziraat cumhuriyet komitetiniñ sabıq yolbaşçısı Aleksandr Liyevniñ bildirgenine köre, Qırımda soñki eki yılda artezian quyularınıñ yüzden çoqu mineralleşti. Onıñ fikirince, bu quyular artıq içme suvı içün qullanılmamalı.
Bu aqta Liyev Qırım.Aqiqatqa bildirdi.
Onıñ qayd etkenine köre, quyularnıñ tuzlanğanı ve mineralleşkeni yarımadada, hususan şimaliy Qırımda pek is etilecek.
«Er yerde olğan şey, Qırımda yañıdan başladı, çünki 50 yıl devamında olmağan edi. Qırımdaki artezian quyuları 50 yıldan berli bar, olarnı 15-20 yıl içinde qullanmaq mümkün. Soñra bu quyular yañırtıla ve kene çalışa edi. Şimdi bu quyular yañartılmaz, çünki suv içilmeycek», – dedi Liyev.
2015 senesi Rusiye suv hocalığı devlet komitetiniñ kollegiyası toplaşıp, suv mineralleşe ve onı suvarmaq içün qullansalar, topraq tuzlanacaq ve bereket olmaycaq, dep hulâsa çıqarğan edi.
İşğal altındaki Qırımda Aqmescitni suvnen temin etmek içün iyünniñ 29-nda İvanovskoye suv inşaatından suv alıp başladılar. «Voda Krıma» müessisesiniñ reberi Vladimir Bajenovnıñ bildirgenine köre, artezian suvları alına. Aksenov, «bunıñ iç bir ekologik telükesi yoq», dep işandırdı
Rusiye kontrolindeki Qırım yolbaşçısı Sergey Aksenovnıñ bildirgenine köre, 2020 senesi 150 yıl içinde eñ qurğaq oldı. Mayısta Qırım suv anbarları 7,1 mln metr kubqa daa az toldı, dep bildirdi Qırımnıñ suv hocalığı komiteti.
Qırımnıñ Rusiye ükümetiniñ reisi Yuriy Gotsanük bildirgenine köre, yarımada esas Ukrainadan Şimaliy-Qırım kanalı üzerinden Dnipro suvınıñ berilüvine muhtac degil.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
