İşğal altındaki Qırımda Aqmescitni suvnen temin etmek içün iyünniñ 29-nda İvanovskoye suv inşaatından suv alıp başladılar. Bu aqta Qırımnıñ Rusiye yolbaşçısı Sergey Aksenov canlı yayında bildirdi.
«Aqmescitni tatlı suvnen temin etmek içün İvanovskoye suv inşaatından daa bir qolnı açamız. Aqmescit qoşma olaraq daa 25 biñ kub suv alacaq. Suv Partizanskoye suv anbarında toplanacaq ve vaziyet eyileşecek», – dedi Aksenov.
«Voda Krıma» müessisesiniñ reberi Vladimir Bajenovnıñ bildirgenine köre, artezian suvları alına. Aksenov, «bunıñ iç bir ekologik telükesi yoq», dep işandırdı.
Qırımnıñ Rusiye mesken kommunal hocalığı naziri Dmitriy Çernâyevniñ bildirgenine köre, Aqmescitke daa bir suv borusı qoyula.
Bundan evel Aqmescit sakinlerini temin etken suv borusına artezian quyularından suv alıp başladılar. Yerli akimiyetniñ malümatına köre, bu «Partizan suv anbarından suv aluvını eksiltmege» yardım ete.
Qırımnıñ Rusiye ükümetiniñ reisi Yuriy Gotsanük bildirgenine köre, yarımada esas Ukrainadan Şimaliy-Qırım kanalı üzerinden Dnipro suvınıñ berilüvine muhtac degil.
İyünniñ 11-nde Kiyvdeki matbuat konferentsiyasında Ukraina baş naziri Denıs Şmığal, Qırımğa Dnipro suvınıñ berilüvi Ukraina kün tertibinde yoq, dep bildirdi.
Ukraina, Qırımnıñ içecek suv ihtiyaclarınıñ 85%-ni yarımadanen bağlağan Dnipro aqıntı yolu olğan Şimaliy-Qırım kanalı vastasınen teminlegen edi. 2014 senesi Rusiye Qırımnı işğal etken soñ yarımadağa suv berilmesi toqtatıldı.
Qırımdaki suv yedekleri suv anbarları ve yerastı çoqraqlardan toldurıla. Ekologlarnıñ aytqanına köre, yerastı çoqraqlarnıñ muntazam sürette qullanılması yarımadada topraqnı tuzlattı. Qırım akimiyeti yarımada sakinlerini suvnı az qullanmağa çağıra.
