Qırımnıñ agrar sanayı kompleksi ve ğıda sanayısı müessiseleri koronavirus sebebinden ilân etilgen karantin vaqtında çalışacaq, dep bildirdi Rusiye kontrolindeki Qırımnıñ köy hocalığı naziri Andrey Rumşin.
Rumşinniñ fikirince, «yarımadanıñ azıq bazarınıñ istiqrarı köy hocalığı istisalcılarına bağlı».
Şunıñ içün köy hocalığı ve ğıda sanayısı saalarında çalışqan müessiselerniñ faaliyeti sıñırlanmaycaq.
Onıñ malümatına köre, al-azırda Qırımda 15 biñ tonna sebze saqlana.
«On biñ tonna aş sertest satışqa kete. Bugün 1700 tonna qartop, 1200 tonnadan çoq lahana, 800 tonna soğan, 8 biñ tonna havuç ve 2400 tonna çükündir saqlana», – dep ayttı baş nazir muavini.
İşğal edilgen Qırımda devlet sımarışçıları, qurucılıq meydançıqları, şahsiy şirket işleri ve bütün qurucılıq-tamir işleri aprelniñ 6-na qadar yasaqlandı. Tamir etilgen hastahaneler ve «Tavrida» yolu istisna olğanlar.
Koronavirus yuqunçınıñ tarqaluvına yol bermemek içün işğal etilgen Qırım ve Aqyarda «yüksek seviyeli azırlıq» rejimi ilân etildi.
Aprelniñ 1-nde aqşam Qırımda koronavirus yuqunçı tarqalğanından yañı sıñırlavlar ilân etildi. Rusiye kontrolindeki Qırım yolbaşçısı Sergey Aksenovnıñ aprelniñ 1-nde bildirgenine köre, Keriç köpründe blokpost qoyulacaq. Onıñ fikirince, koronavirus tarqaluv telükesi bar olğanından karantin tedbirleri daa bir aftağa uzatılacaq.
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
