AQMESCİT – İyün ayında Ukrayinanıñ cenüp yönelişinde ketken şiddetli uruşla şimdi bütün Qırım sakinleriniñ diqqat merkezindeler. Şimdilik Ukrayina quvetleriniñ tez ilerilemesi yoq, bu sebepten Kremlniñ qoqlalarınıñ ritorikası daa qattı oldı.
Amma aynı zamanda, Rusiye tarafdarı olğan Qırım sakinleri içün yahşı şey az. Strategik teşebbüs al-azırda Ukrayina Silâlı Quvetleriniñ qolundadır, Rusiye ordumı mudafaa ete. Keçken sene Harkiv vilâyetinde olğan kibi duşmandan qaçmağanı Rusiye propagandacıları tarafından "muvafaqiyet" kibi kösterile.
Bu arada Qırımda Rus muqaveleli askerlerniñ cebege celp etilmesi devam ete. Eger keçken sene büyük cenkniñ başlanmasından ve muqaveleli askerlerniñ kütleviy şekilde celp etilmesinden soñ olar içün azamiy yaş sıñırı başta 45, biraz soñra 50 yaşqan yüksetilgen olsa, şimdi 60 yaşqa qadar er kes qabul etile. Ebet, bunı da añlamaq mümkün, gençler kreml qartları içün ölmege istemeyler, yaşağan, amma iç bir şeyge irişmegen ve aqçasızlıqtan bezgenler ise imtiyazlar ve yüksek qazan içün er şeyge azırlar.
Söz sırası, Qırımda muqaveleli hızmet aqqında bütün reklama esasen maddiy qazanç üzerinde qurula.
Rusiye prezidenti Vladimir Putin, "keçken sene içinde az kelirli vatandaşlarnıñ qazançı yüzde 30 arttı, 1,7 million rusiyeli ise yoqsullıq sıñırından keçkenler. Menimce bunda kerçeklik bar, çünki muqaveleli hızmetke tam faqırlar kete. Boyeyle şekilde cenkke ketkenlerniñ kelirleri kerçekten yüksek. Cebede elâk olğanlarnıñ aileleri bayağı para alalar. Ve Putin tam olaraq bu kategoriya aqqında ayta, çünki devlet hızmetçileriniñ qazançları pek az.
Qırımlı gençlerniñ Rusiye ordusına qoşulmaq istemegenini tanışımdan alğanım malümat tasdıqlay. Olar, "askerlik hızmetine uyğun olmama meselesiniñ çezilmesi"niñ fiyatı keskin şekilde artqanını bildireler.
Bu arada, Qırımda adetince raatlanıcılardan kelgen yaz kelirlerine beklegen yalı boyundaki sakinler bu sene iş yaramaycağını artıq añladılar. Yerli ealiniñ büyük bir qısmınıñ daimiy işi olmasa ve yıl devamında yazda qazanğan parağa yaşasalar, olar qışta ne yapsınlar?
Qırımnıñ Cenübiy yalısından güzel resimler körmege alışqanmız, amma Qırımnıñ paytahtına eñ yaqın kurort olğan Nikolayevkağa keter ketmez, 2014 senesinden soñ Qırımnıñ turizm saası kerilev içinde olğanı aydı ola.
Qırımnıñ işğalinden evel Nikolayevkanıñ inkişaf etkenini hatırlayım. Bugünde bu çirkin yalı ve yağmmurlardan soñ teren qaqqa çevirilgen asfaltsiz avto turağına saip olğan baqımsız bir köydir.
Bu baqımsız yerge baqqanda, doquz yıl devamında mında turistik infraterkip içün para asla ayırılmağanı kibi is etile. İyün ayınıñ soñu, plâjlar boş.
Bütün bularğa baqqanda, Qırımnıñ turistik saası içün Rusiye bücetinden ayırılğan bktün para qırsızlanğanını añlaysıñ.
Ve eñ esası, Putin rejiminiñ çürügen vertikaline ne cenk, ne sanktsâlar ve ne tecrit tesir etmegen, bu ğaliba tedaviylenmez bir hastalıqtır.
Zarema Seitablayeva, qırımlı bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün: https://d2a3ebzji45ji0.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.