AQMESCİT – Aman-aman eki yıldan ziyade devam etken cenkten soñ Rusiye öz teşviqat işinde ciddiy ilerilev köstere. Evelden esas yöneliş televideniyedeki siyasiy programmalarğa ait olsa edi, olar çoqusını, atta rusiyelilerni bile, açuvlandıra edi, şimdi bu iş er seviyede yapıla.
Rusiye teşviqatı er şeyde küç ala. O, Qırım federal universitetinde yaratılğan Vernadaki adına media kommunikatsiyaları, media tehnologiyaları ve dizayn institutı "propagandistler fabrikasına" çevirile.
Ukrayinada cenkte elâk olğan Rusiye arbiylerinden qaramanlar şekillendirile. Belli ki, böyleliknen cemiyetke yañı arbiyleştirüv aşısı yapıla, çünki "dedeler cenkleşken edi" degen eski qavrayış şimdiki yaşlarğa pek tesir etmey. "Rusiyeniñ yañı qaramanları"nıñ şerefine Qırımda soqaqlarğa, mekteplerge adlar berile, sport tedbirleri keçirile.
Yañı yılnıñ yaqınlaşuvı bile propaganda işiniñ küçlü sebebi olaraq qullanıla, atta bala bağçası balaları ile. Şimdi Qırımnıñ bütün bala bağçalarında "Askerge mektüp" aktsiyası keçirile. Aktsiya şartlarına köre, ana-babalar Ukrayinağa qarşı cenkleşken Rusiye arbiylerine paketlerni toplamaqnen beraber, balalarnen bunıñ maqsadı aqqında laf etmek kerekler.
Balalar bilse edi ki, anda ne içün cenkleşeler... Tanışım Sudaqta Ukraнina arbiy ava quvetleriniñ şifahanesindeki vaziyet aqqında tarif etti, şimdi Rusiye akimiyeti onı RF arbiy ava quvetleriniñ ava limanı idaresine berdi. Yani, şifahane hastahanege çevirildi. Mında cenkten kelgen Rusiye askerleri tedaviyleneler, çoqusı yaralanğanlarnen degil de, aqcigerler yanğısınen keleler - bu hastalıq şimdi cenkte bulunğan arbiyler arasında kütleviy bir hususiyet taşıy.
Tanışımnıñ aytqanına köre, şifahane hadimleri bu kontingentten şoktalar. Apishaneden cenkke ketken sabıq mabüslerniñ çoqusı, olarnı eñ az azırlıqnen ücüm bölüklerine yollaylar. Sanatoriyniñ korpusını qısmını professional arbiylerge, qısmını seferber etilgenlerge ve qısmını sabıq mabüslerge ayırmaq kerek oldı. Ekimler endi öz kontingentini tertipke ketirmek ıntıluvlarından vazgeçtiler, faydasız. O yerde aqşamları episi ile sarhoşlıq başlana. Umumen, şifahane hadimlerini acımaq mümkün.
Soñki çağıruv kampaniyasından meraqlı neticelerni maña askerlikke celp etilecek tanışlarım ikâye ettiler. Qırımnıñ rayon ve şeer çağıruv komissiyalarında celp etmek imkânı olsa, Aqmescitte vilâyet komissiyasına kelgenler ise, ciddiy hastalıqları olğan er kesni çağıra ediler.
Amma cemiyette, teşviqatnıñ ğayretlerine baqmadan, SVO (Rusiyede Ukrayinağa qarşı tam miqyaslı cenkke böyle deyler) merağı bayağı eksilmekte. Meselâ, şimdi körem ki, Rusiye arbiyleri içün sadaqa sepetleri tek "Dobrotsen" tükânlarında qaldı. Em de yarı boş turalar.
Meraqlısı şu ki, Qırımdaki bir çoq tükânda saqlav kameraları yoq etildi. Ne içün böyle yapılğanı aqqında soralğanda, satıcılar, telükesizlik kameralarınıñ ücüm telükesi yüksek olğanından sebep böyle yapılğanını aytalar.
Amma, Qırımnıñ Rusiye yolbaşçısı Sergey Aksönovnıñ aytqanına köre, añlaşmalarğa köre, Qırım plannı yerine ketire, polisniñ esabatı ise pek yaramay. Hatırlayım, işğalden evel Qırımnıñ uquq qoruyıcı organlarına kirmek tanış balalar içün pek qıyın edi - boş yerler az edi, bu hızmet pek itibarlı edi. Şimdi Rusiye politsiyasınıñ strukturalarında boş yerler çoq. Qırım sakinleri anda çalışmağa istemeyler, parağa bile. Meselâ, Qarasuvbazar rayon bölüginde 20 boş yer bar! Böyle bir şey iç bir vaqıt olmadı.
Qırımda Vladimir Putinniñ Rusiye prezidenti vazifesine saylav kampaniyası başlandı. Kerçekten de, çünki bu saylavlarda raqiplik yoq.
Rusiye teşviqatçıları onı Ukrayinada Putin istilâsı V arfi ile keçirmege qarar aldılar .
Çoqusı qırımtatar olğan tanışlarımnen qonuşqanda, bir qırımtatar qadınnıñ şu sözleri maña pek hoş keldi:
"Bir-birimizni közlerimiznen añlamağa alıştıq, çünki sözler telükelidir".
Ve böyle yaşaymız, söz serbestliginiñ sıñırlarını daa ziyade sıñırlaymız, amma istilâcı fikir serbestligini iç bir vaqıt alıp olamaycaq.
Zarema Seitablayeva, qırımlı bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
MALÜMAT: Ukrayinağa qarşı Rusiye silâlı ücümi 2022 senesi fevralniñ 24-nden sabadan berli devam ete. Rusiye ordusı arbiy ve vatandaş infrastrukturasınıñ esas obyektlerine avadan darbe endire, uçaq alanları, arbiy bölük, cermay bazaları, yaqıt stantsiyaları, kilse, mektep ve hastahanelerni viran ete.
Rusiye ordusı çekilgen soñ azat etilgen köy ve şeerlerde kütleviy öldürüv adiseleri aqqında belli oldı. Bazı ğarbiy liderler Rusiyeni cenk cinayetlerinde qabaatladı. Rusiye akimiyeti arbiyleriniñ öldürüvlerge alâqası bar olğanını inkâr etip, olarnı «uyduruv» dep adlandıra.
Rusiye Ukrayinağa qarşı basqıncılıq cenk alıp barğanını inkâr ete ve bunı maqsadı «askeriysizleştirüv ve denatsifikatsiya» olğan «mahsus operatsiya» dep adlandıra.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.