Link açıqlığı

Saatnıñ esas haberi

Qırımlılarnı Rusiyede askerlikke aluv: Qurman rayonında COVID-19 hastaları qayd etildi


Qırımnıñ Qurman rayonında küzde Rusiye ordusına askerlikke aluv kampaniyası vaqtında koronavirus hastaları qayd etildi. Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, askerlikke baracaqlarnı baqqan ekimlerde COVID-19 qayd etildi.

«Dört hasta – hastahane hadimleri, olar küzde askerlikke keteceklernen çalıştı ve maska rejiminiñ bozuluvı neticesinde askerler arasında da hastalar bar», – dep ayttı Penkovskaya oktâbrniñ 21-nde operativ ştab toplaşuvında.

Qırımda keçken künü 203 koronavirus hastası qayd etildi. Umumen Qırımda, yerli akimiyetniñ malümatına köre, 7200 insan koronavirusqa oğradı, 113 kişi vefat etti. Aqyarda 1743 kişi yañı koronavirus yuqunçına oğradı. 1148 kişi tüzeldi, 53 insan vefat etti.

Rusiye kontrolindeki Qırım akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.

Qırım işğalinden soñ Rusiye yarımada sakinlerini öz silâlı quvetlerine askerlikke ala. Ukraina Tış işler nazirliginiñ malümatına köre, soñki altı yılda tahminen 25 biñ qırımlı ve aqyarlı Rusiye ordusına yollanıldı.

Human Rights Watch halqara aq qorçalayıcı teşkilâtı, 2019 senesi baarde arbiy hızmetke çağırılğan qırımlılarnıñ tahminen 85%-ı qomşu Rusiyedeki bazalarğa yollanıldı, dep bildirdi.

BM, Rusiye Qırım sakinlerini öz silâlı quvetlerine çağırmamalı, dep çoq israr etken edi. Teşkilât, Moskvanı halqara uquqqa riayet etmesine çağıra.

Rusiye Ukraina ve halqara teşkilâtlarnıñ beyanatlarına qulaq asmayıp, yarımadada askerlik kampaniyasını devam ettire. Em de askerlik yapmağa istemegen Qırım sakinlerini taqip ete. «Qırım aq qorçalayıcı gruppasınıñ» malümatına köre, 2020 senesi iyül ayına qadar Rusiye Silâlı quvetlerinde askerlik yapmaqtan vazgeçkenlerge qarşı 125 cinaiy dava açıldı, olar Qırım mahkemelerine berildi. 113-üniñ ükümleri çıqarıldı, daa 12-si baqılmaqta.

Qırım Muhtar Cumhuriyeti ve Aqyar şeeriniñ prokurorı İgor Ponoçovnıy, Rusiye ordusına çağırılğan Qırım sakinleri esas Ukrainada cinaiy taqipke oğratılmaycaq, dep haber etti.

Müessise, Rusiye ordusında askerlik yapacağına dair celpname alğan qırımlılardan telefon ya da elektron poçta vastasınen muracaat etmelerini rica ete.

Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.

O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.

2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.

XS
SM
MD
LG