Qırımda yerli şuralarğa rusiye saylavları, olduqça alçaq faallikni kösterdi. Bundan evel saylav protsessinden tek qırımtatarlar vazgeçse, endi başqa qırımlılar da "Rusiye saylavları" adlanğan bu temaşadan közleri qayttı. Qomşu Rusiyeniñ bölgelerinde akimiyet partiyasınıñ vaziyeti yahşıca degil. Menimce, bu, çürük sistemanıñ soñu başlanmasınıñ eñ parlarq köstergiçlerinden birisidir.
"Yedinaya Rossiya" ("Yekâne Rusiye") akimiyet partiyası alâ daa reberliktedir, amma onıñ mevamı hayli zayıflaşa. Saylavlardan soñra Qırımnıñ rusiyeli parlamentinde bile, keçken çağırışqa köre, partiya mebusları azlaştı. Onıñ "şüreti" unutılıp başlay, oña qoşuluv endi, kelecekte istenilmegen aqibetlerni ketire bile.
Buña baqmadan, qırımtatarlar arasında da bu bataqqa başını soqqan "aq qarğalar" tapıldı. Em de "Yekâne Rusiye"ge qoşulğanlarnı aqlamasañ, eñ azından añlamaq mümkün. Bu, ükümge ıntılğan adamlarğa, partiya, deputat mandatlarını berdi, qalğanlarğa rutbe de berir. Amma "Rodina" ("Vatan") adlı qoqla partiyasına qoşulğanlarnıñ nasıl añlamaq mümkün?
Rusiye akimiyetine Qırımda tamam bu kerek - olur-olmaz usullarnen qırımtatarlarnıñ birligini zayıflaştırmaq
Saylavlarda bu partiyanıñ başı - Rusiye mesleatçısı Sergey Glazyevniñ safdaşı Konstantin Knırik oldı. Olarnıñ ekisi de, Ukrainağa qarşılıq faaliyetinen belli. Bu partiyanıñ ne 2014 senesi, ne bu yılnıñ saylavlarında keçmek şansları yoq edi. Bellesem, qırımtatarlarnıñ bu partiyadan kösterilgeni - sadece bir yamanlıqtır. Rusiye akimiyeti, "böl ve üküm et" printsipini Qırımda çoq qullana. Buña köre, az olsa da, amma qırımtatarlarnı öz cedvellerine qoyıp, bu firqa Qırımda öz vazifelerinden birisini becerdi.
Endi bu partiya temsilcisi olğan qırımtatarlar, istegen ükümni almağanından ğayrı, kollaborantlarnı istemegen qırımtatar cemiyetiniñ tışında da qaldı. Rusiye akimiyetine Qırımda tamam bu kerek - olur-olmaz usullarnen qırımtatarlarnıñ birligini zayıflaştırmaq. Ve "Rodina" partiyası bu planda öz vazifesini becerdi. Knırik efendi, bu işi içün nasıldır Kreml bonuslarını da alır, dep tüşünem.
"Rodina" partiyasına qoşulğanlarnıñ vatanı - kârlı yerde, qırımtatar halqı içün ise Vatan - bu Qırım
Amma qırımtatarlarnıñ ekseriyetine, "Rodina" ("Vatan") partiyası azalarınıñ ve, belli vatandaşları olsa da, bu partiyadan namzet köstergen qırımtatarlarnıñ taqdiri iç meraqlı degil. İşte, er kesniñ vatanı başqa. "Rodina" partiyasına qoşulğanlarnıñ vatanı - kârlı yerde, qırımtatar halqı içün ise Vatan - bu Qırım.
2016 yılı mayısta ğayıp olğan Halqara Qırımatatar Qurultayınıñ icra komitetiniñ azası Ervin İbragimovnıñ taqdiri ise, alâ bugüngece bütün qırımtatarlarnı ve dünya topluluğını raatsızlay.
İşte, "Rodina" ya da "Yedinaya Rossiya"nı saylağan qırımtatarlar tüşünsinler, öz halqından ürmetsizliknen ödelgen keçip-ketken menfaatnıñ artından çapmaq kerekmi? Ahır-soñu, böyle, menfaat qıdırıp çapqanlarnı unutalar, amma Reşat Ametov ve Ervin İbragimov kibi küreşçilerniñ adları qırımtatar tarihında ebediy qalacaq.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Bloglar» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün