Ukraina ve bütün dünya toplulığı Qırımnıñ Rusiye tarafından işğali muvaqqat bir mesele olğanına inanğanlırını bildireler. Memleketlerniñ ve halqara teşkilâtlarnıñ liderleri muntazam tarzda yarımada üzerinde nezaretni Ukrainağa qaytarmağa talabınen Rusiye başlıqlarına muracaat eteler. Kreml ise, “Qırım mevzusı qapalı”, dep saya ve bölgede arbiy bulunuvını arttırmağa devam ete ve taleberlerniñ kütleviy askeriyleştirilüvini yapıp, balalar ve gençler arasında “Rusiye vatanperverligi” propagandasını quvetleştire.
Ukraina aq-uquq qoruyıcı teşkilâtlar QMC ve Aqyar şeerindeki prezidentniñ Temsilciligi ile beraberlikte Qırımda “balalarnıñ arbiyleştirilüvinde iştirak etkenler” aqqında malümat toplağanlarını bildirdiler. Bu eñ azından 12 kişi: olarnıñ arasında em Qırımnıñ Rusiye Tasil nazileri, em mektep ocaları. Cedvel mında yayınlanğan.
Yarımadanıñ türlü bölgelerinden tanış ocaları olğan bir Qırım sakini olaraq, qayd etmek ister edim ki, ğaliba Ukraina aq-uquq qoruyıcılarında Qırımnıñ özünden malümat az. Mesele şundak ki, “Zarnitsa”lar, “GTO” yarışları, derslerde “vatanperver arbiy terbiyesi” ve buña oşağan bir şeyler yarımadanıñ bütün bölgelerinde muntazam tarzda keçirile. Bunıñ içün bölge tasil idareleriniñ reberleri mesüliyet taşıy. Bu sebepten bu cedvelge yalıñız Yaltadan degil (aq-uquq qoruyıclar yapqanı kibi), Qırımnıñ bütün diger bölge ve şeerlerinden de tasil idareleriniñ reberlerini kirsetmek mümkün.
Böyle cedveller şübesiz ki, Qırımdaki bir çoq insannı tüşündirecektir. Çünki bu şaqalar degil, bunıñ içün ciddiy mesüliyet ve ceza bar. Ukraina Qırım mevzusını qapatmaq niyetinde degil, aksine – tesir usullarını, şu cümleden qanun seviyesinde mükemmelleştire.
Оружие для самых маленьких: как в Крыму детей приучают к войне (фотогалерея)
Al-azırda yarımadada, umumiy tasilniñ kadet komponentini ayatqa keçirgen 41 umumtasil teşkilât çalışa. Ne içün olarnıñ reberleri cedvelde yoq? 108 kadet sınfında 2486 talebe tasil ala. Ne içün olarnıñ sınıf reberleri cedvelde yoq?
Kadet istiqameti internat tipli müessiselerde kerçekleştirile – bu Keriç tasil-terbiye kompleksi, “Qırım kadet korpusı” kadet mektep-internat. Bundan ğayrı, kadet komponenti bir çoq mektepte dersten tış faaliyet ve qoşma dersler çerçivesinde amelge keçirile.
Balalarnıñ arbiyleştirilüvi ile bağlı keñiş mıqyaslı işler Umumrusiye bala ve gençler cemaat areketiniñ Qırım regional bölügi, “Rusiye kadet qardaşlığı” cemaat teşkilâtınıñ Qırım bölügi tarafından yapıla.
Umumiy tasilniñ kazak komponenti dört belediye umumtasil müessisesinde kerçekleştirile.
С оружием и на конях. Как в Крыму детей в казаки посвящали (фоторепортаж)
Menim fikrimce, aq-uquq qoruyıcılar cedvellerni taqdim etmege biraz aşıqtılar. Yardım içün Qırım faallerine muracaat etse ediler, yarımadada bala ve gençlerni arbiyleştirüv sisteması aqqında daa çoq malümat ögrene bilir ediler.
Bu vaziyet, ukrain aq-uquq qoruyıcılarına qırımlı faaller ile daa faal işbirlik etmek kerek olğanını köstere. Daa doğru ve daa çoq malümat ögrenmek maqsadınen ise başqa-başqa faallernen bağ tutmalılar.
Zarema Seitablayeva, qırımlı, bloger (müellifniñ adı ve soyadı telükesizlik maqsadınen deñiştirildi)
«Fikir» rubrikasında ifadelengen fikir-tüşünceler müelliflerniñ noqta-i nazarını aks ettirip, muarririyetniñ baqışlarınen bir olmaması mumkün
