Link açıqlığı

Saatnıñ esas haberi

Qırımlı Volodımır Baluh acele yardım hastahanesinden yiberildi – faal


Volodımır Baluh
Volodımır Baluh

Qırımdan köçken cemaat faali Natalya Lütikovanıñ bildirgenine köre, sentâbrniñ başında köteklengen soñ ağır alda hastahanege alınğan Kremlniñ eski siyasiy mabüsi, ukrain faali, qırımlı Volodımır Baluh acele yardım hastahanesinden çıqarıldı.

«Volodımır acele yardım hastahanesinden yiberildi, qorqunç ağrı ve bellisizlik etapı bitti. Volodâ yañı kününi reabilitatsiyadan ve eski alına qaytmaq içün azırlıqtan başlaycaq. Yaqın aylarda onı bir çoq meşğuliyet, memleketniñ eñ yahşı hastahanelerden birinde tedaviylev ve, eminim, tamamen tüzelüv bekley», – dep yazdı Lütikova Facebookta, Baluh ile fotoresimni paylaşıp.

Oktâbrniñ 19-nda «Avropa birdemligi» firqası parlament fraktsiyasınıñ reisdeşi İrına Ğeraşçenko Baluhnıñ ekimleri bergen malümatqa esaslanıp, qırımlı siñir cerrahlığı bölüginde yata, dep bildirdi.

Baluhnıñ köteklengeni sentâbrniñ 8-nde saba belli oldı. Kyiv politsiyası bunı aydutlıq dep tasnif etti. Politsiya malümatına köre, Baluh sentâbrniñ 7-nde 10-15 kişinen Gidroparktaki müessiselerden birinde raatlandı. Sentâbrniñ 18-nde politsiya şübhelini tuttı, sentâbrniñ 19-nda mahkeme onı apiske aldı.

Sentâbrniñ 7-nde Baluh, Oleg Sentsov ve 33 diger ukrainalı, hususan siyasiy mabüslerniñ, Rusiye apsinden azat etilüvine bir yıl toldı.

Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.

2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.

Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.

XS
SM
MD
LG