Sentâbrniñ 8-nde köteklengen soñ ağır alda hastahanege alınğan Kremlniñ eski siyasiy mabüsi, qırımlı Volodımır Baluh siñir cerrahlığı bölüginde reabilitatsiyadan keçe. O, yürmege, oqumağa ve yavaş-yavaş tüzelmege başladı. Bu aqta «Avropa birdemligi» firqası parlament fraktsiyasınıñ reisdeşi İrına Ğeraşçenko Baluhnıñ ekimleri bergen malümatqa esaslanıp bildirdi.
«Ekimler, Volodânıñ artıq krossvord çezmege tırışqanını yazdı. Aslında, reabilitatsiya usulları aqqında aytıla. Volodâ siñir cerrahlığı bölüginde yata. Yüre, yavaş-yavaş tüzele, oquy. Bugün kontrol resimleri yapıldı. Müsbet deñişmeler bar. Ekimler Ahtem Çiygozğa (Qırımtatar Milliy Meclisiniñ reis muavini – QA) dostunı yoqlamağa bile izin berdi», – dep yazdı o, Facebook saifesinde.
Ğeraşçenko, Baluh özüne keldi, «laf etip başladı, amma bir şey hatırlamay», dep bildirgen edi.
Baluhnıñ köteklengeni sentâbrniñ 8-nde saba belli oldı. Kyiv politsiyası bunı aydutlıq dep tasnif etti. Politsiya malümatına köre, Baluh sentâbrniñ 7-nde 10-15 kişinen Gidroparktaki müessiselerden birinde raatlandı. Sentâbrniñ 18-nde politsiya şübhelini tuttı, sentâbrniñ 19-nda mahkeme onı apiske aldı.
Sentâbrniñ 7-nde Baluh, Oleg Sentsov ve 33 diger ukrainalı, hususan siyasiy mabüslerniñ, Rusiye apsinden azat etilüvine bir yıl toldı.
Volodımır Baluh – qırımlı çiftçi, ukrainalı cemaat faali, Ukrain milletçileri kongressiniñ azası. Rusiye Qırımnı ilhaq etken soñ Rusiye vatandaşlığından vazgeçti. 2013 senesi qışta evinde Ukraina bayrağını astı, daa soñra «Sema Yüzü qaramanları soqağı» levhasını tikledi.
2016 senesiniñ soñunda Volodımır Baluhnı Rusiye FSBsiniñ hadimleri tutıp aldı. Olar Baluh yaşağan evniñ çardaqında 90 patron ve bir qaç trotil taş tapılğanını bildirgen edi. Rusiye kontrolindeki Qırım mahkemesi onı 5 yılğa azatlıqtan marum etti – eki cinaiy dava boyunca: silâ saqlaması ve «Aqşeyh vaqtınca tutuv izolâtorınıñ yolbaşçısını köteklev» dep adlandırılğan adise.
Baluh qabaatını tanımayıp, açlıqqa başlağan edi. Baluhnıñ imayesi ve aq qorçalayıcıları onıñ Ukrainağa qoltutqanı içün repressiyalarnıñ qurbanı oldı, dep tüşüneler. «Memorial» aq qorçalayıcı merkezi Volodımır Baluhnı siyasiy mabüs olaraq tanıdı.
