Bağçasaraydaki «Hizb ut-Tahrir davasınıñ» mabüsi Aleksandr Sizikov keçken mahkeme-psihiatrik ekspertizasından soñ Aqyar psihiatrik hastahanesinden çıqtı. İlk malümatqa köre, aqlı yerinde olğanını tanıdılar, dep bildirdi advokat Safiye Şabanova Qırım.Aqiqatqa.
«(Tibbiy – QA) qarar aqqında ne maña, ne de Aleksandrge daa haber etilmedi. Amma tahqiqatçınen laf ettim, müvekkilimniñ aqlı yerine olğanını ayttı», – dedi advokat.
Aleksandr Sizikov 30 kün devamında psihiatrik hastahanesinde qalmağa mecbur oldı. Şimdi evde buluna, Sizikovğa qarşı ev apsi qararı devam ete.
«Sağlıq vaziyeti bir qarar. Bir problem bar – maddiy vaziyeti zor. Prokuratura, Rosfinmonitoring ve Rusiye Merkeziy bankına muracaat etsem de, esaplarınıñ bloku lâğu etilmedi. Pensiyasını bile alıp olamay», – dedi Şabanova.
Rusiye kontrolindeki Aqmescitniñ Kiyev rayon mahkemesi oktâbrniñ 14-nde Bağçasaraydaki «Hizb ut-Tahrir davasınıñ» mabüsi Aleksandr Sizikovnı Aqyar şeer psihiatrik hastahanesine mahkeme-psihiatrik ekspertizasına bir ayğa yollamağa qarar aldı.
Ukraina Rusiyeden FSB tarafından «Hizb ut-Tahrir» teşkilâtını qurğanında qabaatlanğan qırımlı Aleksandr Sizikovnı azat etmesini talap ete.
İyülniñ 7-nde Rusiye kontrolindeki Aqmescitniñ Kiyev rayon mahkemesi «Hizb ut-Tahrir» teşkilâtını qurğanından şübheli sayılğan Sizikovnı ev apsine yolladı. Sizikov birinci derece saqatı olı, 2009 senesi soqurlaştı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
