Rusiye akimiyeti tarafından 17 yıl apis cezasına mahküm etilgen qırımlı siyasiy mabüs Timur Yalkabov eki aydan ziyade ceza izolâtorında tutula. Bunıñ aqqında "Qırım birdemligi" cemaat birleşmesi Aliye Yalkabovağa atfı etip bildire.
"Er şey eskisi kibi. Fevralniñ 9-ndan ceza izolâtorındam", - dep haber etti Yalkabov apayına.
Apayınıñ sözlerine köre, Qırım SİZO-sındaki şaraitten soñ onıñ eski hastalığı ağırlaşqan - astma tutuvı başlanğan. Ailesi onıñ sağlıq alına diqqat etmege tırışa.
2022 senesi martnıñ soñunda Rostov-na-Donudaki Cenübiy bölgeniñ arbiy mahkemesi qırımtatar faalleri Timur Yalkabov ve Lenur Seydametovnı "Qırımda terroristik faaliyetiniñ teşkil etilmesinde ve teşkilâtta iştirak etüvde" qabaatlı tanıp, uzun apis müddetke mahküm etti.
2021 senesi fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
«Memorial» aq qorçalayıcı merkezi «qırımlı musulmanlar davasınıñ» mabüslerini siyasiy mabüs dep tanıdı.
Roskomnadzor Qırım.Aqiqat saytını blok etti. Qırım.Aqiqatnıküzgü saytı vastasınen oqumaq mümkün:https://d1ug5n8f9xpr1h.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
