Cuma künü, oktâbrniñ 30-nda, Siyasiy repressiyalarnıñ qurbanlarını hatıra kününde, «Memorial» aq qorçalayıcı merkezi Rusiyedeki siyasiy mabüslerniñ yañı cedvelini derc etti. Olarnıñ malümatına köre, soñki yılda qomşu Rusiyedeki ve işğal etilgen yarımadadaki siyasiy mabüsler sayısı eñ az 21 insanğa arttı.
Laf kütken dinleri ya da diniy mensüpligi (Rusiyede yasaqlanğan, amma Ukrainada çalışmasına izin berilgen «Hizb ut-Tahrir» teşkilâtı ile alâqalar davası) sebebinden azatlıq aqqından marum etilgen qırımlılar aqqında kete: bu Marlen Asanov, Server Zekiryayev, Ernes Ametov (mahkeme onı aqlap azat etti), Timur İbragimov, Seyran Saliyev, Memet Belâlov, Server Mustafayev, Edem Smailov, Rustem Emirüseinov, Eskender Abdulganiyev, Arsen Abhairov, Akramjon Abdullayev, Ayder Capparov, Nematjon İsroilov, Riza Ömerov, Enver Ömerov, Enver Seytosmanov, Ruslan Mesutov, Lenur Halilov, Ruslan Nagayev ve Eldar Kantimirov.
Qayd etilgenine köre, Rusiyedeki siyasiy mabüsler cedvelinde 362 ad bar, bir yıl evelsi anda 305 insan bar edi. Aq qorçalayıcılar bu cedveller «tolu degil», siyasiy mabüslerniñ kerçek sayısı «şübhesiz, daa çoq», dep ayta.
Oktâbrniñ 30-nda Siyasiy mabüs kününde Saharov merkezi, «Memorial» aq qorçalayıcı merkezi ve Boris Nemtsov Azatlıq fondu Rusiyede ve işğali altındaki Qırımda siyasiy sebeplerden yapılğan taqip probleminen bağlı tögerek masanı ötkerdi.
Ukraina Yuqarı Radasınıñ İnsan aqları vekâletlisi Lüdmila Denisova, Rusiye apishanelerinde tutulğan ukrainalı siyasiy mabüslerniñ farqlı sayısı aydınlatqan edi: 113-ten 115-ke qadar, 80-den çoq – qırımtatarıdır. Qırımtatar resurs merkeziniñ cedvelinde 86 qırımlı siyasiy mabüs bar. Qırım aq qorçalayıcı gruppası da aynı raqam aqqında ayta.
Siyasiy mabüslerge qol tutuv programmasınıñ reberi, «Memorial» aq qorçalayıcı merkeziniñ şura azası Sergey Davidisniñ bildirgenine köre, merkezleriniñ cedvelinde 315 insan bar, 59-ı – qırımtatarıdır.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
