Yaltadaki «Hizb ut-Tahrir davasınıñ» mabüsi Muslim Aliyev Başkortostan Cumhuriyetiniñ Salavat şeerindeki №2 Rusiye koloniyasına avuştırıldı.
Bu aqta «Qırım birdemligi» cemaat birleşmesi apayı Naciye Aci-Mamutovanıñ malümatına esaslanıp bildire.
«Ufa şeerindeki SİZO-1-niñ nevbetçi telefon nomerasına telefon ettim, anda belli bir vaqıt tranzitnen oldı, aqayım qayda olğanını bilmek istedim. Mahsus bölüknen bağladılar ve tahqiqat izolâtorınıñ hadimi Salavattaki İK-2-de ceza çekmege ketti, dep bildirdi», – dedi qadın.
Daa evel bildirilgenine köre, Rusiyeniñ Başkortostan SİZOsında tutulğan Aliyevniñ COVID-19 diagnozı tasdıqlanğan edi. Ukraina ombudsmeni Lüdmila Denisovanıñ Telegram saifesinde yazğanına köre, onı belli olmağan tarafqa alıp ketkenler, onıñ bulunğan yeri aqqında bir şey belli degil. Advokat Edem Semedlâyev, Aliyevni qomşu Rusiyeniñ Başkortostanındaki Ufa şeeriniñ №1 SİZOsınıñ hastahanesine yatqızğanlar, dep bildirdi.
İyünniñ 25-nde Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
