Mahküm etilgen qırımlı bloger, cemaat jurnalisti Nariman Memedeminov Rusiyeniñ Rostov vilâyetindeki yaşav tarzı koloniyasına avuştırıldı. Bu aqta advokat Emil Kurbedinov «Qırım birdemligi» cemaat birleşmesine bildirdi.
Advokatnıñ aytqanına köre, yaşav tarzı koloniyasınıñ tam adresini daa soñra haber etecek. İmaye tarafı qırımlı blogerniñ şartlı olaraq vaqtından evel azat etilüvi aqqında ariza berdi, amma etap olğanı içün bunı tekrar yapmağa kerek olacaq, çünki bulunğan yeri deñişti.
«Aqımdaki seneniñ fevral ayında Narimannıñ şartlı olaraq vaqtından evel azat etilmesi içün vaqıt keldi, amma aman-aman yarım yılğa qaldırılğan istinaf sebebinden vesiqalarnı üküm işke tüşürilgen soñ berip oldıq. Lâkin mahkeme muracaatımıznı baqıp yetiştirmedi, çünki onı koloniyağa avuştırğanlar. Tam adresini bilgen soñ bu koloniya olğan yerniñ mahkemesine şartlı olaraq vaqtından evel azat etilmesi içün daa bir ariza yollarmız», – dep izaatladı Kurbedinov.
2019 senesi oktâbr ayında mahkeme Memedeminovnı eki buçuq yıl yaşav tarzı koloniyasında qalmasına üküm etti. İmayesi Avropa insan aqları mahkemesine muracaat etmege niyetlengenini bildirdi.
Bir sıra Ukraina aq qorçalayıcı ve media teşkilâtı halqara teşkilâtlarnı ve Avropa Birligi memleketleri, ABD, Kanada, Yaponiya ükümetlerinden Rusiyeden Memedeminovnı azat etmesini talap etmesine çağırdı.
Moskva vilâyetindeki Vlasiha Arbiy istinaf mahkemesi mayısnıñ 14-nde qırımlı bloger, cemaat jurnalisti Nariman Memedeminovnı terror faaliyetine açıq çağırğanında qabaatlağan ükümni deñiştirmedi.
Nariman Memedeminov – qırımtatar blogeri, vatandaş jurnalisti. Rusiye quvetçileri onı 2018 senesi martnıñ soñunda tutıp aldı. Memedeminovnı Rusiye CK-nıñ 205 maddesiniñ 2-nci qısmına ait olğan cinayette (İnternet vastasınen terrosistik areketlerge açıq çağıruvlar) qabaatladılar.
Rusiye quvetçilerini Memedeminovnıñ 2013 senesinden 2015 senesine qadar alıp barğan YouTubedaki videoblogu açuvlandırdı. Anda siyasiy adise-vaqialarnıñ izaatları ve islâm normalarına riayet etmek çağıruvları, Rusiye devlet bayramları – Vatan imayecisi künü, Dünya qadınlar künü, Bala künü ve digerleri – aqqında fikirler mevcut.
2018 senesi martnıñ 23-nde QMC prokuraturası, Ukraina Cinaiy kodeksiniñ 146-ncı maddesiniñ 2-nci qısmı (insannı qanunsız olaraq azatlıqtan marum etüv ya da alıp qaçuv) ve 162-nci maddesiniñ 2-nci qısmında (mesken toqunılmazlığınıñ bozuluvı) qayd etilgen cinaiy qanun bozuluvlarınıñ alâmetleri boyunca malümatnı Mahkemeden eveldki tahqiqatlarnıñ umumiy cedveline kirsetti.
Ukraina Milliy jurnalistler birligi (UMJB) Qırımda Memedeminovnıñ tevqif etilmesine «fikir serbestligi ve, cümleden İnternet ağı vastasınen, informatsiyanı serbest almaq ve darqatmaq aqqınıñ bozuluvı» dedi.
