Tahminen altı biñ iştirakçini bu yıl «Tavrida» art-festivali ile birleştirilecek «Rusiye – fırsatlar memleketi» forumına Qırımğa ketirecek olalar.
Bunı iyülniñ 17-nde Rusiye prezidenti memuriyetniiñ reber muavini Sergey Kiriyenko bildirdi, dep haber ete TASS agentligi.
Onıñ sözlerine köre, tedbir vaqtında sanitar telükesizligi qaidelerine riayet etilecek.
«Anda eñ azından altı biñ yerleştirip olacağımızğa bakıp areket etemiz... Kövid sıñırlavları imkân berse, qapılarnı açarmız ve istegenlerni kontsertlerge ve büyük tedbirlerge davet etecekmiz, imkân bermese – demek qapalı keçirilecek, amma Rusiye - fırsatlar memleketi platforması leyhalarınıñ ğaliplerini bekleymiz», – dep yazıla bilidrmede.
Qırımnıñ Rusiye sağlıq naziri Aleksandr Ostapenko koronavirus yuqunçı ile küreş ştabınıñ toplaşuvında Qırımda COVID-19 diagnozınen hastahanege alınğan hastalarnıñ sayısı 70% arttı, dep bildirdi.
Qırım ve Aqyardaki Rospotrebnadzor idaresiniñ yolbaşçısı Natalya Penkovskaya bildirgenine köre, keçken afta koronavirus yuqunçından vefat sayısında antirekord qayd etildi. Qırımda esasen ind ştammı tarqala.
Rusiye nezareti astındaki Qırım ve Aqyar akimiyetiniñ koronavirus tarqaluvına dair statistikasını halqara teşkilâtlar ve diger mustaqil menbalar tasdıqlamay. Ukraina aq qorçalayıcıları Qırımnıñ Rusiye akimiyeti hasta sayısını eksiltip bildire, dep bildirgen edi.
COVID-19 koronavirus yuqunçı
Daa evel 2019-nCoV olaraq belli SARS-CoV-2 koronavirusı Qıtayda keçken yılnıñ soñunda qayd etildi.
O, COVID-19 hastalığınıñ sebebi oldı. Hastalıq yengil keçe bile, bazı insanlarda suvuqlanuv ve gripp alâmetleri, yüksek sıcaq ve öksürüv körüne bile. Bu ölüm sebebi ola bilgen pnevmoniyağa keçmesi mümkün. Hastalarnıñ ekseriyeti tüzele; çoqusı allarda immunitet sisteması zayıf olğan insanlar, hususan qartlar vefat ete.
2020 senesi martnıñ 11-nde Dünya sağlıq teşkilâtı yañı koronavirus sebebinden başlağan hastalıq qırğınlığını pandemiya olaraq tanıdı.
