Odessa vilâyetiniñ köç hızmeti, rusiye akimiyeti Qırımda sürgün etken Nedim Halilovnıñ, qaçaq statusı aqqında arizasınıñ baqıluv protsedurasını başladı. Bunı oktâbr 2-sinde o, Qırım.Aqiqatqa tefsir bererek, ayttı.
"Odessa vilâyetiniñ köç hızmeti, meni qaçaq olaraq tanımağa azır olğanını tasdıqladı. Ariza berildi, şimdi vesiqa baqıluv protsedurası başlandı", - aytıp berdi faal.
Onıñ aytqanına köre, o, qıta Ukrainada cemaatçılıqnen oğraşacaq ola.
"Qaçaq statusı alğan soñ ekinci basamaq - migrantlar, qaçaqlar ve memleket içinde köçip kelgen şahıslarnıñ cemaat teşkilâtınıñ yaratılması. Bizmi esas maqsadımız ise, Qırımnı işğalden azat etmesi olacaq", - dedi Halilov.
2016 senesi noyabr 7-sinde Kreml nezareti altındaki mahkeme qararı binaen, 58 yaşındaki qırımtatar faali Nedim Halilovnı Qırımnıñ tışına alıp çıqtılar. Halilovğa evine barıp sıcaq urba, aqça ve vesiqalarını almağa imkân berildi.
Halilov, Özbekistan vatandaşlığı aqqını 2012 senesinde coydı, bundan soñ “vatandaşlıqsız zat” statusını almağa mahkemeden tırıştı, amma Taşkentteki grajdan davaları boyunca Mirzo-Ulugbek rayon mahkemesi 2018 senesi avgust 8 red cevabını berdı.
2016 senesi yazda «Qırımtatarlarnıñ tirenüv areketi» teşkilâtınıñ koordinatorı Nedim Halilov, halqara uquq ve Rusiye qanunlarına esaslanıp, Rusiyeniñ Qırımdaki qırımtatarlarğa qarşı yapqan areketleriniñ qanunsız tanılması içün Rusiye nezareti altındaki Aqmescit Merkeziy mahkemesine muracaatta bulundı. O, qırımtatar tiline devlet tili statusınıñ berilmesini ve mahkeme oturışını qırımtatarca alıp barmağa talap etti.
