Qırımdan Özbekistanğa sürgün etilgen Nedim Halilov onı Ukrainağa qaytarmağa rica ete. Qırım uquqqoruyıcı gruppası haber etkenine köre, bunıñnen qırımtatar Özbekistanda Ukraina elçisine muracaat etti.
“Men Qırımğa (Ukraina) 2002 senesi köçkenimni diqqatqa alıp, yani “Sürgün etilgenler, milliy azlıqlar ve halqlarnıñ aqlarını ğayrıdan tiklenüv meseleleri” boyunca Mustaqil devletler ittifaqdaşlığınıñ (MDİ) añlaşması ükümsürgen vaqıtta, bundan ğayrı tesir etilmez sepeplerniñ (Ukrainanıñ, qırımtatarlarnıñ ve eyi niyetli insanlarnıñ razılığı olmazdan Qırımnıñ Rusiye terkibine kirsetilmesi) kirişmesini közde tutıp, rusiye akimiyeti meni ana-babamnıñ sürgün etilgen yerine mecburiy avuştırğanını da diqqatqa alıp, menim Ukrainağa qaytuv meselemni çezmege rica etem”, - dep aytıla uquqqoruyıcınıñ qolunda olğan vesiqada.
Faalci Özbekistandan öz başına ketip olamağanını añlattı, çünki kerekli vesiqaları yoq, özbekistan pasportını almağa ise qırımtatar istemey.
Halilov, özbekistan vatandaşlığı aqqını 2012 senesinde coydı, bundan soñ “vatandaşlıqsız zat” statusını almağa mahkemeden tırıştı, amma Taşkentteki grajdan davaları boyunca Mirzo-Ulugbek rayon mahkemesi 2018 senesi avgust 8 red cevabını berdı.
Halilov Taşkent grajdan davaları boyunca şeer mahkemesinde bu qararnı temyiz etkeni bildirile.
2016 senesi noyabr 7 qırımlı Nedim Halilovnı Kreml nezareti altındaki mahkeme qararı binaen Qırımnıñ tışına alıp çıqtılar. Halilovğa evine barıp sıcaq urba, aqça ve vesiqalarını almağa imkân berildi.
Vatanda yaşamaq aqqından marum etilgen Halilov, narazılıq olaraq 2016 senesi noyabr 21-de açlıqnı ilân etken edi. 2017 senesi yanvar 5-de 45 künlük aştan vazgeçüvi neticesinde sağlığı fenalaşqanı içün, Halilov açlıqnı toqtatmağa qarar aldı.
2016 senesi yazda «Qırımtatarlarnıñ tirenüv areketi» teşkilâtınıñ koordinatorı Nedim Halilov, halqara uquq ve Rusiye qanunlarına esaslanıp, Rusiyeniñ Qırımdaki qırımtatarlarğa qarşı yapqan areketleriniñ qanunsız tanılması içün Rusiye nezareti altındaki Aqmescit Merkeziy mahkemesine muracaatta bulundı. O, qırımtatar tiline devlet tili statusınıñ berilmesini ve mahkeme oturışını qırımtatarca alıp barmağa talap etti.
