Rusiyeniñ nezaretinde olğan Qurman rayon mahkemesi saba Qırımda küyeçirilgen tintüv vaqtında yaqalanğan Qırımtatar Milliy Qurultayınıñ Merkeziy saylav komissiyasınıñ reisi Zair Smedlâğa 40 biñ ruble para cezasını berdi. O, Rusiyeniñ Ukrayinağa cenki vaqtında "Rusiye ordusını itibardan tüşürüv" ile qabaatlana. Bunı "Qırım birdemligi" cemaat birleşmesi haber etti.
Qurman rayon mahkemesine kelgen Smedlânıñ soy-sopları ve "Qırım birdemligi"niñ mühbirleri, "mahkeme oturışına kimseni kirsetmegenlerini" bildirdiler.
"Mahkeme zalına kirmege, qoltutmağa, qararnı eşitmege, nenen qabaatlanğanını añlamağa istedik. Amma bizni Qurman rayon mahkemesiniñ azbarına bile yibermediler, tışarığa quvdılar, anda beklemege dediler", - dep aytıp berdi Zair Smedlânıñ qızı Dinara Smedlâyeva.
Qırımtatar aq qoruyıcı Lutfiye Zudiyeva, Rusiye qanun qoruyıcı organları al-azırda Qurman rayon mahkemesinde quvette olğan "antiterror ve epidemiologik tedbirleri"ne atfı etip, "cemaatçılıqnıñ bu kibi rezonans doğurğan esnaslarda iştirak etmesini sıñırlamağa" istegenini qayd etti.
Evel haber etilgeni kibi, Smedlâ Facebookta 2022 senesi martnıñ 9-ı tarihlı yazısında "Rusiye ordusını itibardan tüşürgeni" ile qabaatlanğan edi.
Bundan ğayrı Smedlâ "natsist timsalleriniñ propagandası" ile qabaatlana. 2014 senesi martnıñ 1-nde, o, Aqmescitteki kenassanıñ divarları ile foto yerleştirgen edi. Şu divarğa natsist Almaniyanıñ svastikası qara boyanen yapılğan edi. Advokat Emine Avamileva añlatqanı kibi, bu kerçekten öyle edi, amma Smedlânıñ maqsadı bu vaqia aqqında er kesni haberdar etmek edi.
Qırımda Rusiye quvetçileri Qurman rayonında Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv keçirdiler. Zair Smedlânıñ qızı Dinaranıñ bildirgenine köre, babasını yaqalağanlar ve Rusiye polisiniñ yerli bölügine alıp ketkenler. Yaqalav sebepleri şimdilik belli degil.
Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv "qırımtatarlarnı qorqutmaq içün aselet yapıldı". Bunı Qırım.Aqiqatqa Qırımtatar Milliy Meclis reisi Refat Çubarov ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
