Qırımda Rusiye quvetçileri Qurman rayonında Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv keçireler. Bunı "Qırım birdemligi" cemaat birleşmesi haber ete.
"Tintüv saba saat 7:30-ta başlandı. Evde Zair Smedlâ ve apayı edi. Soy-soplarnı içerige kirsetmediler. Uquqiy yardım kösterme içün vaqia yerine advokat Emine Avamileva keldi", - dep yazıla bildirmede.
Zair Smedlânınh qızı Dinaranıñ bildirgenine köre, babasını yaqalağanlar ve Rusiye polisiniñ yerli bölügine alıp ketkenler.
"Soy-soplardan kimseni içerige kirsetmediler. Babamnı yaqaladılar, şimdiçik polisniñ yerli bölügine alıp kettiler, telefon, noutbuk ve qattı diskni tutıp aldılar. Evde tintüv vaqtında tek anam ve babam edi", - dedi Dinara.
Martnıñ 16-nda saba Rusiye quvetçileri Qarasuvbazarda aq qorçalayıcı, qırımtatar areketiniñ veteranı Abdureşit Cepparovnıñ evinde tintüv keçirdi. Cepparovğa advokatlar kirsetilmedi. Tintüvden soñ Rusiye uquq qoruyıcıları Cepparovnı Qarasuvbazar rayon polis bölügine alıp ketti. Rusiye uquq qoruyıcıları tintüv ve sebepleri aqqında resmiy şekilde bildirmey.
Qırımtatar faalleriniñ bildirgenine köre, martnıñ 16-nda saba aq qorçalayıcı Abdureşit Cepparovnıñ evinde keçirilgen tintüv vaqtında tutulğan qırımtatarlar Muhammed Ali Cepparov ve Fevzi Yakubovnıñ bulunğan yeri belli degil edi. Soñra belli olğanına köre, olar Qarasuvbazar rayon bölüginde buluna. Advokat Emil Kurbedinov olarğa uquqiy mesleat yapması içün kirsetilmedi.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
