Rusiye kontrolindeki Seyitler rayon mahkemesi aprelniñ 15-nde «çaqmama davası» boyunca qabaatlanğan vatandaş jurnalisti, «Qırım birdemliginiñ» strimeri Ayder Kadırovnıñ davası boyunca imayeniñ üç muracaatını red etti. Bu aqta «Qırım birdemligi» birleşmesi haber etti.
Qayd etilgenine köre, advokatlarnıñ ilk eki muracaatı qabaatlavnıñ delillerinen bağlı edi: tintüv protokolı ve dinşınaslıq ekspertizası qabul etilmemeli. İmayeniñ fikirince, olar yañlış tizilde ve başqa davalarnıñ delilleri ola. Berilgen malümatqa köre, mahkeme bu muracaatlarnı qanaatlendirmege razı olmadı.
Advokat Lilâ Gemeci Umicon Dadaconovnıñ tayin etilgen imayecisini davet etmege rica etti. Kadırov bu insannen yazışqanında qabaatlana. Mahkeme bu muracaatnı da qanaatlendirmedi.
«Qabaatlav tarafı ise qabaatını tanıp kelgenini delil olaraq kösterdi. Ayder Kadırov ise quvetçilerniñ basqısı altında qabaatını tanımağa mecbur edi, dep ayta. Lilâ Gemeci mahkemeniñ diqqatını müvekkili o vaqıt daa bilmegen cinaiy dava ve ceza kodeksiniñ maddesi qayd etilgenine celp etti», – dep aytıla haberde.
Ayder Kadırovnıñ bildirgenine köre, yazışuv bu madde Rusiye Ceza kodeksine 2016 senesi qoşulmazdan evel oldı.
Daa evel haber etilgenine köre, aprelniñ 5-nde Rusiye kontrolindeki Seyitler rayon mahkemesinde Ayder Kadırovnıñ davası boyunca advokat Aleksey Ladin şaat olaraq sorğuğa çekildi.
2021 senesi yanvarniñ 25-nde Rusiye kontrolindeki Qırımnıñ Seyitler rayon mahkemesi vatandaş jurnalisti, «Qırım birdemliginiñ» strimeri Ayder Kadırovnıñ imayesi bergen cinaiy davanı qapatuv muracaatını red etti. Kadırov Rusiye Ceza kodeksiniñ 205.6 maddesine istinaden qabaatlana – «Cinayet aqqında haber etmeme».
2020 senesi avgustnıñ 31-nde peyda olğan malümatqa köre, Rusiye quvetçileri Sudaq, İçki ve Seyitler rayonlarında qırımtatarlarnıñ evlerini tinte. Faallerniñ malümatına köre, tintüvler Enver Topçi, Ayder Ablâkimov, Ridvan Umerov ve Ayder Kadırovnıñ evinde keçirildi. Onıñ ömür arqadaşı evlerinde tintüv olmadı, amma aqayınıñ Ukraina pasportı tutıp alındı, onı ise Aqmescitke sorğuğa alıp ketkenler, dep bildirdi.
Avgustnıñ 31-nde Rusiye quvetçileri tarafından tutulğan dört qırımtatar faali ketmemek şartınen yiberildi.
Sentâbrniñ 3-nde Aleksey Ladinniñ bildirgenine köre, tahqiqatçı ondan ve müvekkili Kadırovdan ilk tahqiqat malümatını aydınlatmama vesiqasını tutıp almağa tırıştı, amma red cevabını aldı.
Ayder Kadırov sentâbrniñ 10-nda 2020 senesi avgustnıñ 31-nde Qırımdaki Rusiye FSBsiniñ hadimleri tarafından tutulğanını izaatladı.
Qırım Muhtar Cumhuriyetiniñ prokuraturası ve politsiyası qırımtatar faalleriniñ evlerinde keçirilgen qanunsız tintüvlernen bağlı cinaiy tahqiqat başlattı. Ukraina prezidentiniñ Qırım Muhtar Cumhuriyetindeki daimiy temsilciligi qırımtatarlarnıñ evlerinde saba keçirilgen tintüvlerni takbih etti.
Ukraina Tış işler nazirligi Qırımda keçirilgen yañı tintüv ve insan tutuvlarına qarşı narazılıq bildirdi ve Rusiyeden BM qararlarınıñ yerine ketirmesini ve tutulğan qırımtatarlarnı azat etecegini bekley, dep bildirdi.
