Kremlniñ nezaretinde olğan Qırım İstinaf mahkemesi, Rusiyeniñ Volgograd vilâyetindeki qapalı psihiatrik hastahanesinde mecburiy tedaviylevde bulunğan Qırım sakini Yunus Maşaripov içün psihiatriya saasında mustaqil bir mütehassıs celp etmek içün sebep körmegen.
Bunı «Qırım birdemligi» cemaat birleşmesine advokat Aleksey Ladin bildirdi.
«Onıñ cinayet davası artıq eki kere tam olaraq baqılıp, istinafqa ğayrıdan baquvğa berilgen edi», – dedi advokat.
O, evel yapılğan talillerde diagnoz ve tadaviylev tevsiyelerinde farqlılıqlar bar olğanını ayttı. Ladin, mudafaa taarfı bu qararnı kene temyiz etecegini bildirdi.
Evel, Kreml kontrolindeki Qırım Yuqarı mahkemesi qırımlı Yunus Maşaripovnıñ qabaatlavından patlayıcı maddelerniñ qanunsız yapıluvını (Rusiye Ceza kodeksiniñ 223.1 maddesi) çıqardı.
Martnıñ başında Rusiyeniñ Krasnodar Dördünci temyiz mahkemesi patlayıcı işlep çıqarğanında qabaatlanğan qırımlı Yunus Maşaripovnıñ cinaiy davasını tekrar baqılmasına yollamağa qarar aldı.
Maşaripov 2017 senesi sentâbr ayında tutulıp apiske alındı. Onıñ aytqanına köre, Rusiye FSBsiniñ hadimleri onı kötekledi ve aqımnen eziyetlediler, şunıñ içün özüne iftira atmağa mecbur edi. O, 2014 senesinden berli «bala ve pensiyalılarnıñ aqları bozulğanını teşkilâtlarğa bildirip», aq qorçalayıcı faaliyetinen oğraşqan edi.
Rusiye kontrolindeki Yalta şeer mahkemesi Maşaripovnı patlayıcı maddelerni yapqanında ve saqlağanında qabaatlap, 4 yıl koloniyada qalmasına ve 110 000 para cezası (tahminen 41 biñ ğrıvnâ) tölemesine üküm etti.
Qırımnıñ Rusiye Yuqarı mahkemesiniñ Temyiz instantsiyası Maşaripovnıñ şikâyet arizasını qabul etti.
«Memorial» aq qorçalayıcı merkezi Yunus Maşaripovnı siyasiy mabüs olaraq tanıdı.
Qırımlı jurnalist ve faallerniñ evlerinde keçirilgen tintüvler
2014 senesi baarde Qırımnıñ Rusiye işğalinden soñ yarımadada Rusiye quvetçileri mustaqil jurnalist, vatandaş faalleri, qırımtatar milliy areketiniñ faalleri, Qırımtatar Milliy Meclisiniñ azaları ve Rusiyede yasaqlanğan «Hizb ut-Tahrir» ve «Tebliğ Cemaatı» teşkilâtlarınen alâqaları bar olğanından şübheli sayılğan insanlarnı apiske alıp başladı.
