Rusiyeniñ nezaretinde olğan Ermeni Bazar şeer mahkemesi qırımtatar halqınıñ lideri Mustafa Cemilevniñ davasında patronlarnıñ daa bir ekspertizasını keçirmege qarar etti. Bunı Qırım.Aqiqat mühbiri haber etti.
"Bugün mahkeme oturışı vaqtında Mustafa Cemilevniñ davasında suçlama maddelerinden biri içün patronlarnıñ daa bir ekspertizasınıñ tayin etilmesi meselesi baqıldı. Mudafaa tarafı muracaatında qabaatlav tarafı öz muracaatında sualler doğru qoyulmağanı ve qanunsız olğanı sebebinden daa bir ekspertizanıñ tayin etilmesini istedi. Mahkeme muracaatnı baqıp, muracaatta em qabaatlav, em de mudafaa tarafınıñ suallerini qanaatlendirdi ve daa bir eksertizanı mudafaa tarafı istegeni kibi Moskvada degil, Qırımda keçirmege qarar etti", - dep aytıp berdi Nikolay Polozov.
Bundan ğayrı mudafaa tarafı qadı Venera İsroilovanıñ redini istedi. Amma qadı mesleatlaşuv odasına barıp kelgen soñ, red aqqında muracaatnı qanaatlendirmegenini bildirdi.
Rusiye kontrolindeki Ermeni Bazar şeer mahkemesiniñ oturışuvında noyabrniñ 1-nde yarımadada ğıyabiy şekilde mahkeme etilgen qırımtatar halqınıñ milliy lideri Mustafa Cemilevniñ davası boyunca eşyaviy deliller tedqiq etildi.
Avgustnıñ 5-nde mahkeme Qırımnıñ Rusiye iç işler nazirliginiñ sabıq yolbaşçısı Sergey Abisovnı (2014-2018) qırımtatar halqınıñ milliy lideri Mustafa Cemilevniñ davası boyunca sorğuğa çekmek içün tekrar celpname yollaycaq ola, dep bildirdi.
Qırımdaki Rusiye Tahqiqat komitetiniñ idaresi 2020 senesi aprelniñ 13-nde Mustafa Cemilevniñ qabaatlavını Rusiye Ceza kodeksiniñ üç maddesine istinaden aydınlattı: «Rusiyege kirişi yasaqlanğan çetel vatandaşınıñ bir gruppa insanlarnen evelden añlaşıp, Rusiye devlet sıñırını keçüv (Rusiye CK 322-nci maddesiniñ 3-ünci qısmı); nariye silâsını diqqatsız saqlav, onıñ başqa insan tarafından qullanılması ve ağır aqibetlerge yol açması (Rusiye CK 224-ünci maddesi); silânı qanunsız alıp saqlav (Rusiye CK 222-nci maddesiniñ 1-inci qısmı)».
Qırımtatar halqınıñ milliy lideri Mustafa Cemilevniñ davası boyunca martnıñ 5-nde olıp keçken mahkeme oturışuvında imaye tarafı dava malümatlarında bozuvlarnı qayd etti. Advokat Nikolay Polozovnıñ bildirgenine köre, bozuvlar tahqiqatçı azırlağan malümatnen bağlı edi.
Mahkeme oturışuvında belli olğanına köre, Cemilevniñ Qırımğa kiriş yasağı 15 yılğa – 2034 senesi martnıñ 5-ne qadar uzatıldı.
Mustafa Cemilev
Mustafa Cemilev – qırımtatar milliy areketiniñ lideri, dissident, Qırımtatar Milliy Meclisiniñ reisi (1991 senesinden 2013 senesine qadar). Repressiyalarğa oğratılğan edi, 15 yıl sovet apishanelerinde yattı. 303 kün devamında Omsk apishanesinde açlıq tuttı. Rusiye akademiki, dissident Andrey Saharov Cemilevge qol tutıp, BM baş kâtibine mektüp yazdı.
Mustafa Cemilev 1991 senesi Qırımğa qaytıp oldı.
III-IX çağırılış Ukraina Yuqarı Radasınıñ halq deputatı ola.
Cemilev – Türkiyedeki Selçuk universitetiniñ uquq fahriy doktorı, «Ukrain cemiyetiniñ demokratizatsiyası içün» Orlık halqara mukâfatınıñ laureatı ola. Nansen medali (BM), V ve IV seviyeli Yaroslav Mudrıy knâziniñ nişanınen taqdirlengen edi.
2014 senesi Rusiyeniñ Qırım işğaline qarşı çıqtı. Rusiye oña qarşı bir qaç cinaiy dava açtı. 2016 senesi Cemilevniñ namzeti Saharov mukâfatına kösterildi.
