Cuma künü, avgust 14-ünde, Rusiye nezaretindeki Aluşta şeer mahkemesi advokat Rustem Kâmilevniñ ve imam Yusuf Aşirovnıñ apellâtsiya şikâyetini baqmadan terk etti. İmam "qanunsız missionerlik faaliyetinde qabaatlandı". Bunı "Qırım birdemligi"ne advokat Kâmilev bildirdi.
"Aluşta şeer mahkemesi, majkemeciniñ qararına şikâyetimizni baqmadı. Mahkemeci, şikâyetimizniñ red etilmesiniñ sebebi - öz salâhiyetimni kerekli vesiqalarnen tasdıqlamağanım edi, dep bildirdi. Yusuf Aşirovnıñ şikâyeti ise, o tolu olmağanı ve esassız olğanına işaret etip baqmayıp qaldırdılar", - dedi imayeci.
Onıñ fikrince, mahkeme "qanunsız qarar aldı", o bu qararğa İnsan aqları boyunca Avropa mahkemesine şikâyet etecek ola.
"Adamnı imayesiz qaldırdılar. Bu ifadelerni bugün aldıq ve İnsan aqları boyunca Avropa mahkemesine, BMT-nıñ mesuliyetli komitetlerine şikâyet etecekmiz. Çeşit-türlü sebepler ile "Aluşta" din cemiyetini qanunsız taqip eteler, o ise Qırım territoriyasında olğan qanuniyetke köre resmiyleştirildi", - qayd etti Rustem Kâmilev.
Rusiye nezaretindeki Aluşta şeer mahkemesi imam Yusuf Aşirovnı "qanunsız missionerlik faaliyeti"nde qabaatlap 5 biñ rublege cöremeledi.
Martnıñ 2-sinde Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi. Advokatı Ayder Azamatovnıñ fikirince, bu «tam siyasiy dava» ola.
