Rusiye nezaretindeki Aluşta şeer mahkemesi imam Yusuf Aşirovnı "qanunsız missionerlik faaliyeti"nde qabaatlap 5 biñ rublege cöremeledi. Bunı Qırım.Aqiqat mühbirine advokat Rustem Kâmilev aytıp berdi.
"Onı memuriy mesüliyetke celp etip, 5 biñ rublelik cöremeni tayinlediler. Mahkeme imam Yusuf Aşirovnı cöremelemek qararını çıqarğan oturış mensiz keçti, amma men dava baqıluvını başqa vaqıtqa keçirmege muracaat etken edim, çünki ekinci Aqmescit "Hizb ut-Tahrir davası"nıñ protsessinde iştirak ete edim", - dedi advokat.
Kâmilev, imaye mahkeme qararına şikâyet etecegini bildirdi.
Martnıñ 2-sinde Rusiye kontrolindeki Aqmescitniñ Mirovoy mahkemesi aqmescitli imam Rasim Dervişevni «qanunsız missionerlik faaliyetinde» qabaatlap, 5 biñ ruble para cezasını berdi. Advokatı Ayder Azamatovnıñ fikirince, bu «tam siyasiy dava» ola.
