Rusiye nezaretinde olğan Qırımnıñ Yuqarı mahkemesi Rusiyede yasaq etilgen Hizb ut-Tahrir teşkilâtında iştirak etüv ile qabaatlanğan imam Raif Fevziyevni tevqif müddetini üç ayğa uzattı. Bunı «Qırım birdemligine» advokat Edem Semedlâyev bildirdi.
Advokatnıñ sözlerine köre, qabaatlav tarafı, mahkemelengen "şaatlarnı tehdit ete bileceginde ve Ukraina vatandaşı olğanı içün gizlene bileceginde" turdı ve onıñ tevqifli qaldırılmasını talap etti.
«Bu tahqiqatçınıñ hayal küçü», – dedi Semedlâyev.
Böylece o 2021 senesi yanvarnınh 13-nece tevqifli qalacaq.
Rusiye nezaretinde olğan Qırımnıñ Yuqarı mahkemesi Rusiyede yasaq etilgen Hizb ut-Tahrir teşkilâtında iştirak etüv ile qabaatlanğan imam Raif Fevziyevni tevqifli qaldırdı. Haber etilgenine köre, mahkeme advokat Edem Semedlâyevniñ tevqif etilmesine dair evelki mahkeme qararına berilgen istinaf şikâyetini baqqan.
Evel Raif Fevziyev SİZOda tutuv şaraitlerini şikâyet etti.
Hatırlatamız, avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
Ukraina prezidenti Volodımır Zelenskıy Rusiye quvetçileri keçirgen tintüvlerni ve qırımtatarlarnıñ tutuluvını «adden aşır bir insan aqları bozuluvı» dep adlandırdı, Ukraina Tış işler nazirligi ise Rusiyege qarşı narazılıq bildirdi.
Ukraina Yuqarı Radasınıñ insan aqları vekâletlisi Lüdmila Denisova dünyanı qırımtatarlarnıñ Rusiye tarafından taqip etilüvine cevap bermesine çağırdı.
Sekiz aq qorçalayıcı teşkilât Rusiyeden avgustnıñ 17-nde tutulğan qırımtatarlarnı azat etmesini talap etti.
