Rusiye nezaretinde olğan Qırımnıñ Yuqarı mahkemesi Rusiyede yasaq etilgen Hizb ut-Tahrir teşkilâtında iştirak etüv ile qabaatlanğan imam Raif Fevziyevni tevqifli qaldırdı. Bunı Qırım birdemligine advokat Edem Semedlâyev bildirdi.
Haber etilgenine köre, mahkeme advokat Edem Semedlâyevniñ tevqif etilmesine dair evelki mahkeme qararına berilgen istinaf şikâyetini baqqan.
Adliyeciniñ bildirgenine köre, mahkeme mudafaa tarafınıñ iç bir delilini köz ögüne almağan.
"Raif böyle fikirde: o kendini qabaatlı tanımay, davanı ise siyasiy saya" dedi Semedlâyev.
Evel Raif Fevziyev SİZOda tutuv şaraitlerini şikâyet etti.
Hatırlatamız, avgustnıñ 17-nde Rusiye quvetçileri Qırımda birden beş qırımtatarınıñ evini tintti. Soñra faaller Rustem Murasov ve Rustem Tairov, Aqyarnıñ Balıqlava rayonında Cebbar Bekirov, Bağçasaray rayonında Zaur Abdullayev, Aqmescit rayonında Raif Fevziyev tutuldı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
