Rusiyeniñ nezaretinde olğan Sudaq şeer mahkemesinde Qırımtatar regional Meclisisniñ reberi İlver Ametvonıñ davası boyunca ilk mahkeme oturış olıp keçti. Faal "nariye silânıñ qanunsız saqlaması" ile qabaatlana. Söz, siyasetçiniñ evindeki müzeyde cam altında saqlanğan Ekinci Cian cenkinden qalğan tüfekniñ parçaları aqqındadır. Bunı "Qırım birdemligi" haber ete.
"Qabaatlav hulâsası ile Ametov razı olmadı, şaatnıñ kelmemesi sebebinden mahkeme oturışı mayısnıñ 16-na qaldırıldı", - dep haber etti advokat Aleksey Rostovtsev.
Hatırlatamız, avgustnıñ 5-nde Rusiye kontrolindeki Sudaq şeer mahkemesiniñ qadısı Yelena Bosi nariye silâsınıñ parçalarını qanunsız saqlağanında qabaatlanğan qırımtatar faali İlver Ametovnıñ cinaiy davası boyunca üküm çıqardı.
Avgustnıñ 4-nde munaqaşa vaqtında devlet qabaatlayıcısınıñ vekili mahkemeden Ametovnıñ azatlığını 10 ayğa sıñırlamasını istedi. İmaye faalni aqlamağa rica etti. Advokat Aleksey Rostovtsevniñ munaqaşalardan soñ bildirgenine köre, mahkeme qararı müvekkili içün menfiy olsa, o, istinaf şikâyetini berecek.
2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.
Dava malümatına köre, «2019 senesi sentâbrniñ 27-nde evde keçirilgen qıdıruv tedbirleri vaqtında İlver Ametovdan alınğan silâ bir namlu, qısqa namlu, tegiz namlu, kesken, bir kereden toldurılğan, «Nagan» sistemasınıñ (1895 s.) yedi tolu nariye ekvivalenti ola. Bir qutulı, bir mehanizmli, 1891-1930 seneleri nariye silâsınıñ parçalarınen».
2021 senesi iyül ayında İlver Ametovnıñ qabaatlav hulâsasından nariye silâsını qanunsız aluvnen bağlı qısım çıqarıldı.
Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.
Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.
İlver Ametov – qırımtatar milliy areketiniñ faali, Sudaq regional meclisiniñ reisidir.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: https://d3f6698iwwkivl.cloudfront.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
