Link açıqlığı

Saatnıñ esas haberi

Rusiye prokurorı qırımtatar faali İlver Ametovnıñ azatlığını sıñırlamağa rica ete


Qırımtatar faali İlver Ametov, Sudaq, 2021 senesi mart ayı
Qırımtatar faali İlver Ametov, Sudaq, 2021 senesi mart ayı

Rusiye prokurorı qırımtatar faali İlver Ametovnı silânı qanunsız saqlağanında qabaatlap, azatlığını doquz ayğa sıñırlandırmağa rica ete. Bu aqta Qırım.Aqiqat mühbiri haber ete.

Taraflarnıñ munaqaşaları keçirilgen oturışuvğa faallerge qol tutmağa kelgen tahminen 15 insan toplaştı. Faqat mahkeme binasına kimse kirsetilmedi, koronavirus yuqunçınıñ tarqaluvı ile küreş talaplarına esaslandı.

Mabüsniñ advokatı Aleksey Rostovtsevniñ bildirgenine köre, munaqaşalar vaqtında Rusiye prokurorı Ametovnıñ nariye silâsını qanunsız saqlav qabaatı «bütünley isbatlandı», dep ayttı, ve on ayğa azatlıqtan marum qaldırmağa rica etti.

Faalniñ imayesi munaqaşadan evel «bir çoq protsessual bozuvğa» diqqat ayırdı ve bir sıra vesiqanı qabul etilmeycek delil olaraq çıqaruv aqqında muracaat etti. Faqat mahkeme red etti. Ametovdan alınğan silânı tekrar ekspertizağa yollamağa da razı olmadı.

Munaqaşa vaqtında imaye İlver Ametovnıñ cinaiy maqsadı olmadı ve vatandaşlarğa yasaqlanğan eşyalarnı kimseden saqlamadı, aksine öz müzeyinde numayış etti, dep qayd etti. Bundan ğayrı, bu areketlerden menfiy bir şey olmadı ve olamaz edi. Advokat Ametovnı aqlamağa rica etti.

Oturışuvdan soñ Aleksey Rostovtsev qayd etkenine köre, mahkeme qabaatlav tarafını qabul etse, o, istinaf şikâyetini yollamağa planlaştıra. Üküm yarın, avgustnıñ 5-nde, saat 09:00-da çıqarılacaq.

2019 senesi sentâbrniñ 27-nde Sudaqta Rusiye quvetçileri İlver Ametovnıñ evini tintti. Qırımtatar Milliy Meclisiniñ aza şeadetnamesi, müzey eşyaları, bazı vesiqalar «ekspertizağa» alındı.

Advokat Nazim Şeyhmambetovnıñ Qırım.Aqiqat mühbirine bildirgenine köre, Rusiye quvetçileri tintüvlerni Rusiye Ceza kodeksiniñ 280, 282 ve 238 maddelerine istinaden cinayetlerden şübhe bar olğanı içün «tahqiqattan evel teşkerüvi çerçivesinde» keçirdi.

Qırım Muhtar Cumhuriyetiniñ prokuraturası İlver Ametovğa ait binalarda keçirilgen «qanunsız tintüvler» sebebinden cinaiy tahqiqat başlattı.

Bu sene mayıs ayında berilgen malümatqa köre, Kreml kontrolindeki Sudaqnıñ Mirovoy mahkemesi İlver Ametovğa 150 biñ ruble para cezasını bermege qarar aldı. Para cezası onıñ iş adamı olaraq köstergen faaliyetinen bağlıdır.

Bloklav ve tsenzurasız haberler! Qırım.Aqiqat qullanımını qurmaq içün iOS ve Android.

XS
SM
MD
LG