Rusiye nezaretinde olğan Qırımnıñ Yuqarı mahkemesi «Hizb ut-Tahrir» davasınıñ mabüsleri Ernest İbragimov ve Oleg Födorovnıñ tefqif müddetiniñ uzatılması aqqında işğalci Kyiv rayon mahkemesiniñ qararına qarşı berilgen istinaf şikâyetini qanaatlendirmekten red etti.
«Qırım birdeligi» cemaat birleşmesiniñ advokat Lilâ Gemecige atfı etip bildirgenine köre, qadı İbragimovnıñ boynunda dört ufaq bala ve yüklü apayı olğanını ve eki erkekniñ aqqında müsbet hasiyetname olğanını itibarğa almağan.
Gemeci, bu dava boyunca tahqiqat yekünlengenini ayttı. Qabaatlav hulâsaları endi berilgen, eñ yaqın vaqıtta dava Cenübiy bölgeniñ arbiy mazkemesine yollanacaq.
Hatırlatamız, aprelniñ 13-nde Rusiye kontrolindeki Qırım mahkemesi «Hizb ut-Tahrir davasınıñ» mabüsleri Oleg Födorov, Azamat Eyupov ve Ernest İbragimovnıñ apis cezasıны iyülniñ 15-ne qadar uzattı.
Daa evel belli olğanına köre, Qırımdaki mahkeme apiske alınğan faal ve iş adamı Oleg Fedorovnı mecburiy mahkeme-psihiatrik ekspertizasına yolladı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Apiske alınmazdan evel Lenur Seydametov qırımtatar siyasiy mabüslerine aş mallarını alıp yollağan edi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
