Kremlniñ nezaretinde olğan Qırımnıñ Yuqarı mahkemesi Qarasuvbazar «Hizb ut-Tahrir davasınıñ» mabüsi Azat Eyupovnı tevqili qaldırdı. Bunı «Qırım birdemligi» cemaat birleşmesi advokat Emil Kürbedinovğa atfı etip bildirdi.
Mahkemeniñ advokat Rusiyeniñ nezaretinden olğan Kyiv ranon mahkemesiniñ tevqif müddetiniñ uzatılması ve SİZO-da tutulması aqqında qararına qarşı bergen istinaf şikâyeti qanaatlendirmegeni haber etile. Mudafaa tarafı bu qaranen razı degil ve onı temyiz mahkemesinde temyiz etecek ola.
Advokat mahkemelengenge cenk vaqtında ealiniñ qorunması aqqında IV Jeneva Şartnamesiniñ qaideleriniñ qullanmasını talap etti. Eyupovnıñ özü mahkeme oturışında Ukraina vatandaşı olğanını bildirdi.
Kürbedinovnıñ bildirgenine köre, mahkeme oturışı qapalı edi.
«Yuqarı Mahkeme bu oturışlarnı çoq yıl devamında esassız qapalı keçirile, dep sayam. Şimdi ise COVID-19-nı qullanıp, öz aqqını suistimal ete ve mahkeme oturışlarnı qapata», – dedi advokat.
Hatırlatamız, aprelniñ 13-nde Rusiye kontrolindeki Qırım mahkemesi «Hizb ut-Tahrir davasınıñ» mabüsleri Oleg Fedorov, Azamat Eyupov ve Ernest İbragimovnıñ apis cezasıны iyülniñ 15-ne qadar uzattı.
Daa evel belli olğanına köre, Qırımdaki mahkeme apiske alınğan faal ve iş adamı Oleg Fedorovnı mecburiy mahkeme-psihiatrik ekspertizasına yolladı.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Apiske alınmazdan evel Lenur Seydametov qırımtatar siyasiy mabüslerine aş mallarını alıp yollağan edi.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
