Rusiye kontrolindeki Qırım Yuqarı mahkemesi dekabrniñ 10-nda Aqmescitteki ekinci «Hizb ut-Tahrir davası» mabüsleriniñ apiste qaluv müddetini uzattı. Alim Karimov, Rustem Şeyhaliyev, Erfan Osmanov, Osman Arifmemetov, Mecit Abdurahmanov, İzzet Abdullayev, Vladlen Abdulkadırov ve Ruslan Suleymanov 2021 senesi yanvarniñ 14-ne qadar apiste qalacaqlar, dep bildire «Qırım birdemligi» Facebookta.
«Mahkeme oturışuvında Rustem Şeyhaliyev sağlıq vaziyeti fenalaştı, dep ayttı. İmaye, em Aqmescit SİZOsında, em Rostov vilâyetiniñ eki SİZOsında bulunğan 21-inci ayı devamında müvekkilim Rustem Şeyhaliyev sağlıq vaziyetini bir qaç kere şikâyet etken edi. Amma bütün muracaatları diqqatsız ve cevapsız qaldı», – dep tarif etti mahkeme aqqında Emine Avamileva.
Advokat Lilâ Gemeci Ruslan Suleymanovnıñ sağlıq vaziyeti aqqında da ayttı.
«Ruslannı apiste tutuv müddeti 1 ayğa uzatıldı. Öksüre, amma bu şaraitlerde alı bir qarar, dep aytmaq mümkün. Qol tutqanıñız içün epiñizge teşekkürlerini bildirdi», – dep bildirdi Lilâ Gemeci.
Mahkemede Aqmescitteki ekinci gruppa mabüsleriniñ ömür arqadaşları da bar edi.
«Qaç aydan berli, aman-aman bir buçuq yıl devamında körüşmek içün ariza beremiz, amma izin bermeyler, aqayımnı körmege çarem yoq. Şunıñ içün bu mahkemeler – tuvğanlarımıznı körmek içün bir ümüt», – dedi Vladlen Abdulkadırovnıñ apayı Gülzar.
Qomşu Rusiyeniñ Soçi üçünci İstinaf mahkemesi Aqmescitteki ekinci «Hizb ut-Tahrir davasınıñ» mabüsleri Ruslan Suleymanov ve Seyran Murtazanıñ 2020 senesi dekabrniñ 15-ne qadar apiste qaldıruv qararlarına qarşı imaye şikâyetlerini red etti.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
