Kreml kontrolindeki Qırım Yuqarı mahkemesi «Hizb ut-Tahrir davası» üç mabüsiniñ sıñırlav tedbirini uzatuv qararına qarşı temyiz arizalarını red etti. Böylece, Ruslan Mesutov, Enver Ömerov ve Lenur Halilov avgustnıñ 5-ne qadar SİZOda qalacaqlar, dep bildire «Qırım birdemligi» cemaat birleşmesi.
Faallerniñ malümatına köre, oturışuv qapalı şekilde keçirildi.
Ruslan Mesutov, Lenur Halilov ve Enver Ömerov iyünniñ 10-nda Qırımda Rusiye quvetçileri tarafından keçirilgen tintüvlerden soñ tutuldı.
Rusiye FSBsi tahqiqat tedbirleri 205.5 maddesi (terror teşkilâtınıñ faaliyetini teşkil etüv ya da iştirak etüv) boyunca cinaiy dava çerçivesinde keçirile ve «Hizb ut-Tahrir» teşkilâtınen bağlı, dep bildirdi.
Ukraina uquq qoruyıcı organları Qırımda Rusiye quvetçileri keçirgen tintüvlerden sebep cinaiy tahqiqat başlattı.
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokat Emil Kurbedinovnıñ qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
