Rusiye nezaretinde olğan Qırım Yuqarı mahkemesi, evel bir kişilik piketlerinde iştirak etkenleri içün para cezasına mahküm etilgen Qırım sakinleri Arsen Abhairov ve Rustem Emirüseinovnıñ anaları- Zeliha ve Zure hanımnıñ istinaf şikâyetlerini red etti.
Bunı iyülniñ 6-nda «Qırım birdemligi» cemaat birleşmesi haber etti.
Faallerniñ malümatına köre, qarar qadılar kollegiyasınıñ muşaveresi olmadan çıqarılğan.
«Qararnı reislik yapqan qadı, mahkeme oturışından evel azırlanğan kâğıttan oqudı. Qırım Yuqarı mahkemesiniñ qadısı Vladimir Agin mudafaa tarafınıñ delillerini köz ögüne almadı ve tercimannıñ iştiragi aqqında muracaatnı da red etti», –dep haber etile.
Advokat Ayder Suleymanovnıñ aytqanına köre, qadı oturışı açıq olğanına baqmadan jurnalistlerge foto ve video çıqarmağa yasaq etken
Ayder Suleymanov piketler türlü şeerlerde keçirilgenini ve bunıñ isbatları da bar olğanını aytqan. Ve piketlerniñ teşkilâtçısı belgilenmegenine diqqat çekken.
Mudafaa tarafı mahkeme qararlarını İnsan aqları Aropa mahkemesinde temyiz etecek ola.
Moskva kontrolindeki Qurman rayon mahkemesi Qurmandaki «Hizb ut-Tahrir davasınıñ» mabüsi Arsen Abhairovnıñ anası Zeliha Abhairovanı «toplaşuv, miting, numayış, yürüş ya da piket keçirüv nizamını bozğanında» (Rusiye Memuriy bozuv kodeksiniñ 20.2 maddesiniñ 5-inci qısmı) qabaatlap, 10 000 ruble para cezasını berdi.
Abhairovağa qarşı bir kişilik narazılıq aktsiyasını keçirüv qaidelerini bozğanı içün memuriy dava açıldı. 2020 senesi oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqqan edi.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
