Moskva kontrolindeki Qurman rayon mahkemesi Qurmandaki «Hizb ut-Tahrir davasınıñ» mabüsi Arsen Abhairovnıñ anası Zeliha Abhairovanı «toplaşuv, miting, numayış, yürüş ya da piket keçirüv nizamını bozğanında» (Rusiye Memuriy bozuv kodeksiniñ 20.2 maddesiniñ 5-inci qısmı) qabaatlap, 10 000 ruble para cezasını berdi.
Bu aqta «Qırım birdemligi» cemaat birleşmesi Qırım.Aqiqatqa bildirdi.
Advokatlar Ayder Suleymanov ve Sabri Talıpov birleşmege mahkemede «mahkeme tahqiqatı tertibiniñ protsessual uquq normaları bozuldı», dep bildirdi. Olarnıñ aytqanına köre, imaye delilleri seslendirilgen soñ mahkeme munaqaşa çerçivesinde Abhairovağa sözge çıqmağa imkân bermeyip ve mesleat odasına ketmeyip qarar çıqardı.
«Bu bir nonsens. Dava malümatındaki ciddiy bozuvlar aqqında ayttıq ve qadı birden qararnıñ sebeplerini oqup bere», – dep ayttı faallerge Ayder Suleymanov.
İmayeciler memuriy bozuv protokolını dava malümatından çıqarmağa rica etti – çünki tizilgende bir sıra hata yapıldı, memuriy protokol tizilüviniñ müddeti de bitti.
Mahkeme bu muracaatnı red etip, «Rusiye Kodeksi cinaiy-protsessual ya da akemlik ile aynı olmayıp, delilni çıqaruv kibi protsessual areketlerge izin bermey», dep bildirdi. Rusiye Memuriy bozuv kodeksiniñ 24.4 maddesine esaslanıp, qadı bu muracaatnı red etmege qarar berdi».
Bundan ğayrı, imayeci Sabri Talıpovnıñ qayd etkenine köre, oturışuv başında qadı diñleycilerni açıq oturışuvdan çıqmalarını rica etti, yapqanlarınıñ sebebi «memlekette epidemiologiye vaziyet» ola, dep ayttı.
«Qadı bu davada yañlışlarnı qayd etecek ve mahkemeniñ adaletsiz olğanını körecek diñleyiciler olmasın dep istegendir degen hulâsa çıqarmaq mümkün», – dep bildirdi fikrini imayeci Sabri Talıpov.
Abhairovağa qarşı bir kişilik narazılıq aktsiyasını keçirüv qaidelerini bozğanı içün memuriy dava açıldı. 2020 senesi oktâbrniñ 31-nde Qurmandaki «Hizb ut-Tahrir davası» mabüsiniñ anası Zeliha Abhairova oğlu Arsenniñ taqip etilüvine qarşı bir kişilik narazılıq aktsiyasına çıqqan edi.
Noyabrniñ 3-nde saba Rostov-na-Donu Cenübiy okrugınıñ arbiy mahkemesi Qurmandaki «Hizb ut-Tahrir davasınıñ» üç mabüsi Rustem Emiruseinov, Arsen Abhairov ve Eskender Abdulganiyevni 17, 13 ve 12 yılğa üküm etti. Olar qabaatlarını tanımadı. Mahküm etilgen qırımlılarnıñ advokatları ükümni şikâyet etip, Avropa insan aqları mahkemesine barmağa niyetlene.
2019 senesi fevral ayında Qurman rayonınıñ Büyük Onlar (Oktâbrskoye) qasabasında Rusiye uquq qoruyıcıları tintüv keçirdi. Daa soñra Aqmescitteki FSB idaresine Eskender Abdulganiyev, Arsen Abhairov ve Rustem Emiruseinov alındı.
Rusiye Federal telükesizlik hızmeti Qurman rayonınıñ üç sakinini «Hizb ut-Tahrir» teşkilâtında iştirak etkeninden şübheli sayıp yaqalağanını tasdıqladı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
