Martnıñ 31-nde Kremlniñ nezaretinde olğan Qırımnıñ Yuqarı mahkemesi 2021 senesi mayısnıñ 21-nece Bağçasaray «Hizb ut-Tahrir davasınıñ» mabüsi Vadim Bektemirovnıñ tefqif etilmesine qarşı istinafnı red etti. Bunı Bektemirovnıñ advokatı Marlen Halikov «Qırım birdemligi» cemaat birleşmesine bildirdi.
«Mudafaa tarafı qararnı lâğu etmege rica etti. Bugünki mahkeme oturışında mahkeme şikâyetni qanaatlendirmedi», – dep yazıla bildirmede.
Halikovnıñ sözlerine köre, Vadim Bektemirovnıñ alı bir qarar, o er keske minnetdarlıq bildirgen.
Nevbetteki mahkeme oturışı aprelniñ 9-nda olacaq. Advokat Emil Kürbedinovnıñ malümatına köre, Bektemirovnı Aqmecsit SİZO-sından Rostov-na-Donuğa etap eteckler, anda davanıñ esası baqılacaq.
Advokatnıñ sözlerine köre, mahkeme, dörtünci Jenena şartnamesine köre mahkemelengen Ukraina vatandaşı sayılğanı ve Qırımdan çıqarılması ve qanunsız taqip etilmesi yasaq olğanı aqqında muracaatlarnı da red etken.
Bağçasaray «Hizb ut-Tahrir davası» mabüsi Vadim Bektemirov martnıñ 10-nda qabaatlav hulâsasını aldı.
2020 senesi iyülniñ 7-nde Rusiye quvetçileri yedi qırımtatarınıñ evini tintti: Qurman rayonınıñ Büyük Onlar qasabasında Emil Ziyadinov, Aqmescit rayonınıñ Kurtsı qasabasında İsmet İbragimov, Bağçasaray rayonınıñ Jeleznodorojnoye köyünde Alim Sufyanov, Bağçasaray rayonınıñ Süyür Taş (Belokamenka) köyünde Seyran Hayretdinov, Bağçasaray rayonınıñ Sevastyanovka köyünde Aleksandr Sizikov, Aqmescit rayonınıñ Bavurçı (Kamenka) köyünde Vadim Bektemirov ve Aluştada Dilâver Memetovnıñ. O, tintüv keçirilgende evde degil edi, onı qıdırmağa devam eteler.
Rusiye FSBsiniñ malümatına köre, mahsus hızmetniñ hadimleri Qırımda «Hizb ut-Tahrirni» teşkil etkeninden ve iştirak etkeninden şübheli sayılğan yedi insannı tuttı. FSB, bu insanlar «Qırım sakinleri arasında terror mefküresini yayıp, qırımlı musulmanlarnı öz saflarına celp etti», dep bildire. Rusiye mahsus hızmetiniñ matbuat hızmeti bildirgenine köre, «(teşkilât) azalarınıñ yaşağan yerlerinde Rusiyede yasaqlanğan «Hizb ut-Tahrir al-İslami» propaganda malümatları, terror faaliyetinde qullanılğan bağ vastaları, elektron malümat taşıyıcıları tapılıp alındı».
Ukraina prezidentiniñ Qırım Muhtar Cumhuriyetindeki temsilciligi Rusiye quvetçileriniñ areketlerini takbih etti, Milliy politsiyanıñ Qırım Muhtar Cumhuriyeti ve Aqyar Baş idaresi ise Ukraina Ceza kodeksiniñ 162-nci maddesiniñ 2-nci qısmına istinaden (mesken tiyilmemezligini bozuv) cinaiy tahqiqat başlattı.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
