Rusiye kontrolindeki Aqmescitniñ Kiyev rayon mahkemesi noyabrniñ 11-nde Aqmescitteki ekinci «Hizb ut-Tahrir davasınıñ» sekiz mabüsine apis müddetini üç ayğa uzattı, dep bildire Qırım.Aqiqat mühbiri.
Böylece, Rustem Şeyhaliyev, Tofik Abdulgaziyev, Raim Ayvazov, Bilâl Adilov, Cemil Gafarov, Farhod Bazarov, Rustem Seythalilov ve Şaban Umerov 2020 senesi fevralniñ 15-ne qadar apiste qalacaqlar.
Mahkeme, qabaatlarnıñ «ağır» olğanına esaslanıp, imaye tarafınıñ sıñırlav tedbirini deñiştirmek muracaatını red etti.
«Mahkeme oturışuvında bir sıra muracaatımız oldı. Faqat qadı bütün muracaatlarnı red etti, bir danesini qabul etmedi, şu sebepten bugün aqlarımıznı qorup olamadıq, birden qabaatlayıcı olacaq bir taraflı esnas oldı. Raim Ayvazov qadı ve prokurornı çetleştirmege talap etti, lâkin mahkeme bunı red etti, ve qarar birden seslendirildi», – dep tarif etti advokat Rustem Kâmilev.
Advokat Mariya Eysmont mahkemege istegen er kesniñ mahkeme salonına alınmağanı sebebinden şikâyet arizasını berdi.
«İşdeşimnen mahkeme reisi adına şikâyet arizasını yazdıq, açıq mahkeme oturışuvına bütün soy-soplar ve kelgen diger insanlar alınmadı. Salonda yer bar edi, lâkin oturışuvğa er kes kirip olamadı», – dep qayd etti Mariya Eysmont.
Hatırlatamız, «Hizb ut-Tahrir davasınıñ» (Aqmescitteki ekinci gruppa) mabüsi Şaban Umerov Rusiye kontrolindeki Aqmescitniñ Kiyev rayon mahkemesinde yaramadı, oña «acele yardım» çağırıldı.
Martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Rusiye FSBsi Qırımda tintüvler keçirilgenini tasdıqladı.
Martnıñ 27-nde ve 28-nde Aqmescitniñ Kiyev rayon mahkemesi tutulğan faallerni apiske aldı.
Martnıñ 29-nda Rusiye uquq qoruyıcıları Qırımdaki tintüvlerden soñ qıdırılğan qırımtatar faali Edem Yayaçikovnı tutıp aldı.
Remzi Bekirov, Riza İzetov, Ruslan Suleymanov, Farid Bazarov ve Şaban Umerov Rusiye Ceza kodeksiniñ 205.5 maddesiniñ 1-inci qısmına (terror gruppasınıñ faaliyetini teşkil etüv) istinaden qabaatlana. Qalğanları terror teşkilâtınıñ faaliyetinde (Rusiye Ceza kodeksiniñ 205.5 maddesiniñ 2-nci qısmı) iştirak etkeninden şübheli sayıla.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
