Rusiyeniñ Qarasuvbazar rayon mahkemesi aq qoruyıcı, qırımtatar milliy areketiniñ veteranı Abdureşit Cepparovnı 15 künge tevqif etti. O, içtimaiy ağlarda "natsist atributikasınıñ ve timsalleriniñ propagandası" ile qabaatlana. Bunı "Qırım birdemligi" cemaat birleşmesine advokat Emine Avamileva bildirdi.
Onıñ malümatına köre, Cepparov 2019 senesi avgust ayında idare etken saifede "natsist timsalleriniñ faal numayışı" ile bağlı beş daqqalıq video yayınlaması ile qabaatlana.
Advokatnıñ sözlerine köre, Cepparov, bu kerçekten onıñ saifesi olğanını ve anda video yayınlanğanını, lâkin onıñ fikrince o "propaganda" degil "iza etkenini" ve maqsadı "natsist timsallerniñ numayışı" olmağanını mahkemege añlatqan.
Advokat Emine Avamileva Cepparovnıñ teqif etilmesi aqqında qararnı temyiz etmek niyetindedir.
Qırımda Rusiye quvetçileri qırımtatar milliy areketiniñ veteranı ve aq qorçalayıcı Abdureşit Cepparovğa tintüv keçirmege keldi. Bu aqta «Qırım birdemligi» cemaat birleşmesi haber etti.
Ukrayina TİN Rusiyeni işğal etilgen Qırımda qanunsız tutulğan bütün Ukrayina vatandaşlarını azat etmege çağırdı.
Cepparovnıñ tutulmasına Ukraina prezidentiniñ Qırım MC-deki daimiy temsilciligi de qarşılıq kösterdi.
Temsilcilikniñ malümatına köre, "qırımtatar faali Abdureşit Cepparovnıñ Qırım MC Qarasuvbazar rayonında qanunsız tintüv ve tutulması tamır qırımtatar halqınıñ sıqıştırıp çıqarıluv siyasetiniñ devamıdır, aqlarnıñ mudafaasında birdemlik ve faallikniñ er angi kösterilüviniñ bastıruv aktıdır, cemaat ve aq qoruyıcı faaliyet içün nevbetteki taqip aktıdır".
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
