Ukrayina TİN Rusiyeni işğal etilgen Qırımda qanunsız tutulğan bütün Ukrayina vatandaşlarını azat etmege çağırdı. Bunıñ aqqında Ukrayina TİN yolbaşçısınıñ birinci muavini Emine Ceppar Twitter saifesinde bugün Qırımda üç qırımtatarnıñ, şu cümleden aq qoruyıcı Abdureşit Cepparovnıñ tutulmasını izaatlap yazdı.
"Rusiye Qırımnıñ tamır halqını taqip etmege devam ete. Bugün üç qırımtatar tutuldı - aq qoruyıcı Abdureşit Cepparov, Yakubov Fevzi ve Muhammed-Ali Cepparov", - dep yazdı Ceppar.
O, Rusiye Ukrayinağa qarşı cenki toqtatmaq, bütün Ukrayina topraqlarından, hususan Qırımdan ordusını çıqarmaq, qanunsız sürette tutulğan Ukrayina vatandaşlarını azat etmek ve yapqan zararını ödemek kerek, dep yazdı.
"Biz Qırımnı ve Ukrayina toprağınıñ er bir parçaçığını qaytarırmız, Rusiyeni bütün cinayetleri içün cevap bermege mucbur etermiz", - dep qayd etti o.
Cepparovnıñ tutulmasına Ukraina prezidentiniñ Qırım MC-deki daimiy temsilciligi de qarşılıq kösterdi.
Temsilcilikniñ malümatına köre, "qırımtatar faali Abdureşit Cepparovnıñ Qırım MC Qarasuvbazar rayonında qanunsız tintüv ve tutulması tamır qırımtatar halqınıñ sıqıştırıp çıqarıluv siyasetiniñ devamıdır, aqlarnıñ mudafaasında birdemlik ve faallikniñ er angi kösterilüviniñ bastıruv aktıdır, cemaat ve aq qoruyıcı faaliyet içün nevbetteki taqip aktıdır".
Qırımda Rusiye quvetçileri qırımtatar milliy areketiniñ veteranı ve aq qorçalayıcı Abdureşit Cepparovğa tintüv keçirmege keldi. Bu aqta «Qırım birdemligi» cemaat birleşmesi haber etti.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
