Cenübiy okrugınıñ arbiy mahkemesi Yaltadaki «Hizb ut-Tahrir davası» boyunca mahküm etilgen Vadim Sirukqa Rusiye quvetçileri 2016 senesi fevral ayında evinde keçirilgen tintüv vaqtında alğan smartfonnı qaytarmağa qarar berdi. Bu aqta advokat Emil Kurbedinov «Qırım birdemligine» bildirdi.
Berilgen malümatqa köre, Siruk mahkeme oturışuvında Başkortostandaki Rusiye koloniyasından video bağı vastasınen iştirak etti. Advokatlar Rusiye kontrolindeki Qırım garnizon arbiy mahkemesinde edi. Neticede mahkeme Sirukqa 5 yıl evelsi alınğan cep telefonını ceza çekken yerde qaytarmağa qarar aldı.
«Cep telefonı alındı ve tintüv protokolında alınğan olaraq qayd etildi. Tahqiqatçı onı delil olaraq da ilâve etti. Faqat ne Cenübiy okrugınıñ arbiy mahkemesi oturışuvında, ne de bundan soñ bir yerde qayd etilmedi ve qabaatlav tarafı tarafından kösterilmedi, ükümde de qayd etilmedi. Bugün bu telefon meselesi çezildi. Yani bugün arbiy mahkeme, arbiy prokuror, advokatlar bir plastmassa parçasınıñ kelecegini belgilemek içün toplaştı», – dep izaatladı imayeci.
Advokatnıñ aytqanına köre, Siruknıñ alı bir qarar ve o, bütün faal, dost, Qırımdaki ve tışındaki cemaatqa selâm yollamağa rica etti. Yaqında onı Ukrainanıñ Rusiye konsulı Viktor Pletnikov ziyaret etti.
İyünniñ 25-nde Moskva vilâyetiniñ (Rusiye) Vlasiha şeerindeki Arbiy istinaf mahkemesi Yaltadaki «Hizb ut-Tahrir davasınıñ» altı mabüsiniñ ükmüni deñiştirmeyip qaldırdı.
Böylece, Rostov-na-Donu Cenübiy okrugınıñ arbiy mahkemesiniñ 2019 senesi qabul etken qararı deñişmedi. Mahkeme qararına köre, Muslim Aliyev 19 yılğa, İnver Bekirov 18 yılğa, Emir-Usein Kuku 12 yılğa, Vadim Siruk 12 yılğa, Arsen Cepparov 7 yılğa ve Refat Alimov 8 yılğa üküm etildi. Olar sert rejimli koloniyada qalacaqlar.
Amnesty International aq qorçalayıcı teşkilâtı Yaltadaki «Hizb ut-Tahrir davasınıñ» bütün mabüslerini vicdan mabüsi dep adlandırdı.
Ukraina Tış işler nazirligi bu üküm sebebinden Rusiyege narazılıq bildirdi.
Bu dava boyunca qabaatlanğanlar 2016 senesi fevral-aprel aylarında Yaltada tutulğan edi. Olarnı Rusiyede yasaqlanğan «Hizb ut-Tahrir» islâm siyasiy teşkilâtına alâqaları bar olğanında qabaatlaylar.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
