Fevralniñ 17-nde Rusiye FSBsiniñ hadimleri tarafından tutulğan, «Hizb ut-Tahrir davasınıñ» mabüsi Lenur Seydametov Qırımdaki Rusiye mahkemesiniñ qararınen mecburiy mahkeme-psihiatrik ekspertizasına yollanıldı.
Bu aqta «Qırım birdemligi» birleşmesi Seydametovnıñ imayecisi Refat Yunusovnıñ aytqanlarına esaslanıp Qırım.Aqiqatqa bildirdi.
Martnıñ 18-nde advokat Qırımnıñ psihiatrik hastahanesinde müvekkilini ziyaret etip subetleşti.
Advokatnıñ aytqanına köre, cinaiy dava çerçivesindeki mahkeme ekspertizası 21 kün devam etecek. Tedqiqat devamında mabüs odasında közetilecek.
«Sağlığını şikâyet etmey, amma maneviy olaraq melül», – dep tarif ete imayeci.
Fevralniñ 17-nde saba erte yarımadanıñ bir qaç rayonında Rusiye quvetçileri musulmanlarnıñ (ekseriyeti qırımtatarı ola) evlerine keldi. «Qırım birdemligi» birleşmesiniñ faalleri Qırım.Aqiqatqa bildirgenine köre, İçki rayonında Mamamadinov Abdulbori, Qarasuvbazarda Azamat Eyupov, Aqmescitte Yalkabov Timur, Bağçasarayda İbragimov Ernest, Bağçasarayda Fedorov Oleg, Aqmescitte Seydametov Lenur ve Aqyarda Şihametov Yaşarnıñ evinde tintüv keçirildi.
Apiske alınmazdan evel Lenur Seydametov qırımtatar siyasiy mabüslerine aş mallarını alıp yollağan edi.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını «terrorist» birleşme cedveline kirsetip, onı yasaq etti.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Adliyeciler qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
