Rostov-na-Donu (Rusiye) №1 tahqiqat izolâtorında tutulğan Aqmescitteki ekinci «Hizb ut-Tahrir davasınıñ» mabüsi Mecit Abdurahmanovnıñ sağlıq vaziyeti pek fenalaştı. Bu aqta Ukraina Yuqarı Radasınıñ insan aqları vekâletlisi Lüdmila Denisova Facebook saifesinde bildirdi.
«Mecit Abdurahmanov sırtı ağıra, dep şikâyet ete, özü areket etip olamay. Mecitniñ daa bir mahkeme oturışuvında bulunması içün oña yerli anesteziya yapıldı. Bundan soñ areket etmesi içün mahsus tibbiy vasta yardımmınen mahkemege ketirildi», – dep aytıla haberde.
Denisovanıñ malümatına köre, SİZO hadimleri Abdurahmanovnıñ memuriyetke tibbiy yardım aqqında muracaatlarını körmemezlikke ura, bu da insan aqlarını boza.
«Bugün SİZO memuriyeti Ukraina vatandaşına kerekli tedqiq ve tedaviylev köstermey, SİZO tibbiy bölügine berilgen muracaat ise körmemezlikke urıla. Bu BM İqtisadiy ve İçtimaiy şuraları qabul etken Mabüslerge yanaşuv esas qaideleriniñ 22-nci maddesini boza ve işkence ya da insaniyetsiz, ya da itibarnı aşalağan yanaşuv sayıla», – dep yazdı Denisova.
Denisovanıñ qayd etkenine köre, o, Rusiye insan aqları vekâletlisi Tatyana Moskalkovağa muracaat etip, Abdurahmanovnıñ aqlarını ğayrıdan tiklemege ve oña kerekli tibbiy yardım köstermege talap etti.
Hatırlatamız, fevral ayında Mecit Abdurahmanov daa 12 qırımtatarınen beraber Rostov-na-Donu №1 tahqiqat izolâtorına etap etildi. Onı Aqmescitteki «Hizb ut-Tahrir davasınıñ» mabüsi olaraq tutalar.
2019 senesi martnıñ 27-nde FSB, Rusiye İç işler nazirligi ve Rusiye gvardiyasınıñ hadimleri martnıñ 27-nde Qırımda qırımtatarlarnıñ, şu cümleden «Qırım birdemligi» faalleriniñ evlerinde tintüvler keçirdi. Umumen Rusiyede ve işğal etilgen Qırımda yasaqlanğan «Hizb ut-Tahrir» teşkilâtında iştirak etkeninde qabaatlanğan 24 faal tutulğan edi.
2019 senesi martnıñ 27-nde ve 28-nde Aqmescitniñ rayon mahkemesi bütün tutulğanlarnı apiske aldı.
OSCE kütleviy haber vastalarınıñ serbestligi vekili Harlem Désir martnıñ 27-nde Qırımda keçirilgen kütleviy tintüvlerden soñ «Qırım birdemligi» faalleriniñ apiske alınuvını takbih etip, olarnıñ Rusiye SİZOsından acele azat etilüvine çağırğan edi.
Rusiye Tış işler nazirligi OSCE kütleviy haber vastalarınıñ serbestligi vekili Harlem Désirniñ apiske alınğan «Qırım birdemliginiñ» faallerini, Qırımdaki vatandaş jurnalistlerini azat etmek çağıruvları «şaşıra», dep bildirdi.
«Memorial» aq qorçalayıcı merkezi 2019 senesi martnıñ 27-nde Qırımda Rusiye quvetçileri tarafından tutulğan 24 qırımtatar faalini siyasiy mabüs dep tanıdı.
Qırımdaki «Hizb ut-Tahrir davaları»
«Hizb ut-Tahrir davası» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
