Aqmescitte ğıyabiy şekilde mahkeme etilgen qırımtatar faali Edem Bekirovnıñ cinaiy davası boyunca imaye şaatları esas Ukrainadan Qırımğa olğan kiriş sıñırlavları sebebinden mahkeme oturışuvına kelip olamadı. Bu aqta Qırım.Aqiqat mühbiri bildire.
Onıñ malümatına köre, Rusiye kontrolindeki Aqmescitniñ Merkeziy rayon mahkemesiniñ oturışuvında advokat Aleksey Ladin oturışuvnı başqa künge qaldırmağa rica etti. Böylece, imayeciler al-azırda esas Ukrainada bulunğan ve epidemiyağa qarşı sıñırlavlar sebebinden mahkemege kelip şaatlıq etip olamağan şaatlarnıñ kelmesi içün ğayret köstermege tırışacaq.
Advokatnıñ aytqanına köre, laf Edem Bekirov musafirlikke kelgen ve onıñ qabaatı olmağanını tasdıqlamağa azır olğan soy-sopları aqqında kete.
«İmaye mahkeme oturışuvını başqa vaqıtqa qaldırmağa rica etip, şaatlarnı davet etmege, olarnı mahkemege sorğuğa çekmege ve ne olğanını aytmaları içün ğayret köstermege tırışacaq: Edem Bekirov kimsege patlayıcı madde bermedi», – dep ayttı advokat Ladin.
Mahkeme muracaatnı qanaatlendirip, mahkeme oturışuvını mayısnıñ 11-ne qaldırdı.
Eski siyasiy mabüs, qırımtatar faali Edem Bekirovnıñ cinaiy davası fevralniñ 19-nda Aqmescitte temelden baqılıp başlandı. Bundan evel Qırım Yuqarı mahkemesi evelki instantsiya mahkemesiniñ qararını deñiştirmeyip, eski siyasiy mabüs, qırımtatar faali Edem Bekirovnı qıdıruvğa ilân etti.
2020 senesi mayısnıñ 14-nde Kreml kontrolindeki Aqmescitniñ Merkeziy rayon mahkemesi 2019 senesi sentâbr ayında Ukraina ve Rusiye arasında tutulğan şahıslarnı deñişüv neticesinde SİZOdan azat etilgen qırımtatar faali Edem Bekirovnıñ cinaiy davasını yañıdan baqıp başladı. Daa soñra aynı mahkeme faalni mahkemege «zornen ketirmege» qarar berdi. Mayısnıñ 22-nde prokurornıñ muracaatınen qadı Bekirovnı qıdıruvğa ilân etmege qarar aldı.
Edem Bekirov davası
Herson vilâyetindeki Novooleksiyıvka qasabasınıñ sakini Edem Bekirov dekabrniñ 12-nde saba Qırım kirişinde Rusiye uquq qoruyıcıları tarafından tutıldı. O, 78 anasını ve aqrabalarını ziyaret etmek içün Qırımğa ketti. Daa soñra onı Aqmescitteki Rusiye FSB binasına alıp ketkenler. Kreml kontrolindeki Aqmescitniñ Kiyev rayon mahkemesi Bekirovnı eki ayğa apiske aldı.
Advokat Aleksey Ladinniñ bildirgenine köre, Bekirov Rusiye Ceza kodeksiniñ 222-nci maddesiniñ 2-nci qısmı ve 222.1-inci maddesiniñ 2-nci qısmı boyunca (patlayıcı madde ve patronlarnı saqlav ve berüv) şeklene. Uquqçı Lilâ Gemeci qayd etkenine köre, faal 10 kilogramm trotil ve 190 muarebe patronını taşuv ve tarqatuvda qabaatlana.
