Qırımdaki «Aluşta» din cemiyetiniñ sabıq reisi Ruslan Emirvaliyevniñ adına oña tizilgen memuriy protokol aqqında mektüpnen haber etildi, dep bildire «Qırım birdemligi» cemaat teşebbüsi.
Advokat Lilâ Gemeci qayd etkenine köre, mektüp Emirvaliyevge keldi, amma oktâbr ayında din cemiyetiniñ yañı reisi saylandı. Protokol tizilüvi içün Emirvaliyevni 2021 senesi yanvarniñ 13-nde Qırımdaki Rusiye Adliye nazirliginiñ idaresine davet eteler.
Advokatnıñ aytqanına köre, bu sefer Adliye nazirligi Rusiye Memuriy bozuv kodeksiniñ 19.5 maddesiniñ 1-inci qısmına istinaden – «Qanun bozuvlarınıñ yoq etilmesini kontrol etken devlet nezaret organları (vekâletli şahısnıñ) qararını yerine ketirmeme» – bozuv alâmetlerini qayd etti.
«Adliye nazirligi «Aluşta» cemiyetini tolusınen yoq etmege ve cami ve müminlerni kontrol etmege istey», – dep emin advokat.
Emirvaliyevge «dava malümatlarını ögrenmege, şaatlıq etmege, delil köstermege, muracaat bermege, imayeciniñ uquqiy yardımından faydalanmağa aqqı bar», dep haber etile. Kelmese, memuriy protokol onsız tizilecek ve kopiyası üç kün içinde poçta vastasınen yollanılacaq, dep aytıla.
Hatırlatamız, 2020 senesi avgust ayında «Aluşta» din cemiyetiniñ reisi olğan Ruslan Emirvaliyev Rusiye kontrolindeki Aluşta şeer mahkemesiniñ içtimaiy ağlardaki «ekstremizm propagandası» içün belgilegen para cezasını ödedi.
Daa evel belli oldı ki, işğal altındaki Qırımnıñ «Aluşta» din cemiyeti «Ekstremist faaliyeti ile küreş» Rusiye qanunına köre tenbilendi. Rusiye kontrolindeki Qırım Adliye nazirligi Ruslan Emirvaliyevni bu din cemiyetiniñ qurucıları erkânından çıqarmağa talap ete.
Mayısta Rusiye kontrolindeki Aluşta şeer mahkemesi «Aluşta» din cemiyetiniñ reisine «ekstremizm propagandası» sebebinden 1000 ruble para cezasını berdi. Bundan evel Ruslan Emirvaliyevni prokuraturağa çağırıp, İnternette ekstremist timsalleriniñ propagandasını yapqanlarında qabaatladılar.
«Hizb ut-Tahrir işi» boyunca apiske alınğan ve mahküm etilgenlerniñ imayecileri olarnıñ taqip etilmesi diniy sebeplernen bağlı olğanını tüşüne. Advokatlar qayd etkenine köre, Rusiye uquq qoruyıcı organları tarafından bu dava boyunca taqip etilgenler – ekseriyeti qırımtatarlar ve ukrain, rus, tacik, azeri ve islâm dinini kütken diger millet vekilleri. Halqara uquq işğal etilgen topraqlarda işğalci devlet qanunlarını kirsetmege yasaqlay.
«Hizb ut-Tahrir» halqara islâm siyasiy teşkilâtı, bütün musulman devletleriniñ islâm halifeligine birleştirilmesini öz maqsadı olğanını ayta, amma olar, bu maqsatqa irişmek içün terroristik usullarnı red ete ve Rusiyede adaletsiz taqip etilgenini ayta. Rusiye Yuqarı mahkemesi 2003 senesi «Hizb ut-Tahrir» teşkilâtını 15 «terrorist» birleşme cedveline kirsetip, onı yasaq etti.
