Rusiye kontrolindeki Aluşta şeer mahkemesi «Aluşta» yerli musulman din cemiyetiniñ reisi Ruslan Emirvaliyevge 1000 ruble para cezasını berdi. Bu aqta Qırım.Aqiqat mühbiri bildire.
Advokat Lilâ Gemeci bildirgenine köre, Ruslan Emirvaliyevni Rusiye Memuriy cinayetler kodeksiniñ 20.3 maddesine istinaden mesüliyetke çekmek içün VKontakte içtimaiy ağındaki saifesinde qoyulğan fotoresim sebep oldı.
«Mahkemede, bizim fikirimizce, bozuv olğan şeylerge diqqat ayırdıq: saifeniñ Ruslan Emirvaliyevge ait olğanına dair qarar yoq edi, bu fotoresim qoyulğan IP-adresiniñ bağı yoq edi. Bu saifeniñ klonı ola bile, dep qayd ettik», – dep qoştı Gemeci.
İmaye tarafı davanı Ruslan Emirvaliyev ve qorantasına yapılğan basqı dep saya.
Mayısnıñ 28-nde berilgen malümatqa köre, Ruslan Emirvaliyev prokuraturağa çağırılıp, İnternette ekstremist teşkilâtı timsalleriniñ propagandasında qabaatlandı.
2014 senesiniñ işğalinden soñ Qırımdaki Rusiye akimiyeti mustaqil jurnalistler, vatandaş faalleri, Qırımtatar Milliy areketiniñ faalleri, Qırımtatar Milliy Meclisiniñ azaları ve Rusiyede yasaq etilgen «Hizb ut-Tahrir» teşkilâtı ile alâqalı olğanlarından şübheli sayılğan Qırım musulmanlarınıñ evlerinde muntazam surette kütleviy tintüvler ötkere.
