Qırımda saba keçirilgen tintüvden soñ yaqalanğan Qırımtatar halqı Milliy Qurultayınıñ Merkeziy saylav komissiyasınıñ reisi Zair Smedlânı "natsizm propagandası" ve "Rusiye ordusını itibardan tüşürüv" ile qabaatladılar. Bunı "Qırım birdemligi" cemaat birleşmesine advokat Emine Avamileva bildirdi.
Onıñ sözlerine köre, 2014 ve 2022 seneleri Zair Smedlânıñ Facebook saifesinde yayınlanğan yazılar memuriy uquq bozmalar içün şekliy sebep olğan.
Birinci qabaatqa binaen Smedlâ memuriy uquq bozmanıñ predmetiniñ tutıp alınması ile beraber 1000-den 2000 biñge qadar memuriy para cezasını ala bile ya da memuriy uquq bozmanıñ predmetiniñ tutıp alınması ile beraber 15 künge tevqif etile bile. Ekinci qabaatqa binaen 30 000-den 50 000 biñge qadar para cezasını ala bile.
Zair Smedlâ Rusiye quvetçileriniñ qabaatlavlarını açıq izaatlamadı.
Qırımda Rusiye quvetçileri Qurman rayonında Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv keçirdiler. Zair Smedlânıñ qızı Dinaranıñ bildirgenine köre, babasını yaqalağanlar ve Rusiye polisiniñ yerli bölügine alıp ketkenler. Yaqalav sebepleri şimdilik belli degil.
Qırımtatar halqı Qurultayınıñ Merkeziy saylav komissiyasınıñ reisi Zair Smedlânıñ evinde tintüv "qırımtatarlarnı qorqutmaq içün aselet yapıldı". Bunı Qırım.Aqiqatqa Qırımtatar Milliy Meclis reisi Refat Çubarov ayttı.
Roskomnadzor Qırım.Aqiqat saytını blok etti. Qırım.Aqiqatnı küzgü saytı vastasınen oqumaq mümkün: rukrymr.azureedge.net. Esas adise-vaqialarnı Qırım.Aqiqatnıñ Telegram ve İnstagram saifelerinden taqip etiñiz.
